অৱাং ত্রিপুরাগী কাঞ্চনবারী খুনগী পুখ্রি অচৌবীগী শ্রীশ্রী রাধাগোবিন্দ মান্দপতা হৌখিবা নভেম্বরগী তাং ৩০ নিংথৌকাবা রাসপূর্ণিমা নুমিৎকা মরী লৈননা ওল কাঞ্চনবারী মনিপুরী উনুকোতি অৱাং ত্রিপুরা না শিল্লাংদুনা লমদমসিগী মৈতৈশিংনা মমাংঙৈদগী পাঙথোকতুনা লাকখিবা ষণশেনবা জগোয় অমদি রাস লিলা জগোয় নোংমা চুপ্না পাঙথোকখ্রে। নুমিৎসিগী নুংথিলগী পুং ১ রোম তাবদগী হৌখিবা থৌরম অসি মথং মনাও নাইনা অশোয় অঙাম অমত্তা য়াওদনা নুমিদাং চুপ্না পাঙথোকপগা লোয়ননা নোংঙাল্লমদাইফাওবা জগোয়গী থৌরম চৎথখি। থৌরমদা খ্বাই গৌরনগর ত্রিপুরাগী মমিং লৈরবা ওজা নিঙোম্বম বীরসিং না রাজধারি ওইখি। কৈশাম ওংবী প্রভাবতি দেবী, থৌনাওজম হীরা দেবী, শংলেন ময়ুম ওংবী সবিতা দেবী, লৈহাওথাবম নন্দিতা শর্মা অমসুং শান্তনা দেবীনা জগোই খুদিংমক্কী শৈশক তমখি। জগোয়গী মকোক চীংখিবী নিঙোম্বম পুস্পিতা দেবীগী ফজরবা জগোয় শাথেকনা নুমিৎসিগী থৌরম অতৈসু মপুঙ ফাহনখি। অৱাং ত্রিপুরাগী কাঞ্চনবারী খুনগী পুখ্রিঅচৌবীগী শ্রী শ্রী রাধাগোবিন্দ মান্দোপতা পাঙথোকখিবা থৌরম অসিদা চাওরাক্না মীওই ১৫০না ভাবোককী লৈতেং ওইখি হায়না পাউ অসিনা মখা তারি। (পাউ অসি ইউতিউবতা য়েংবিউ)