আসাম সরকারনা রাজ্য অসিগী য়েলহৌ-ফুরূপশিংগী সাহিত্য সভাশিংদা শেলগী তেংবাং পীরগনি হায়না লাউথোকখ্রে। অমুকখক্তগী ওইনা পীগদবা শেলগী তেংবাং অসি আসাম সাহিত্য সভাদা লুপা কোতি ১০, বোড়ো সাহিত্য সভাদা লুপা কোতি ৫ অমসুং অতৈ য়েলহৌ-ফুরূপশিংগী সাহিত্য সভাশিংদা লুপা কোতি ৩ তৌদুনা পীরগনি হায়রি। ৱাফমসি দিসেম্বরগী তাং ৩১, ২০১৯ দা গুৱাহাতিদা মুখ্যমন্ত্রী সর্বানন্দ সোনোৱালনা ময়ায় তাংবল লৌদুনা ফমখিবা মীফম অমদা লেপ্নখিবনি। ৱারেপ অসিগী মতুং ইন্না আসাম সাহিত্য সভানা মখোয়গী কোর্পাস ফন্দগী শেন্দোই ওইনা চহীগী লুপা লাখ ৮০ লৌথোকপা য়াগনি। বোড়ো সাহিত্য সভানা লুপা লাখ ৪০ অদুগা অতৈ য়েলহৌ-ফুরূপশিংগী সাহিত্য সভাশিংনা মখোয়গী কোর্পাস ফন্দগী শেন্দোই ওইনা চহীদা লুপা লাখ ২৪ তৌদুনা লৌথোকপা য়াগনি হায়রি।
ভাষা গৌরব স্কীমগী মখাদা রাজ্য অসিগী তোঙান তোঙানবা কমিউনিতিশিংদগী অইবা লিশিং অমা খনগৎতুনা মখোয়দা অমুকখক্তগী ওইনা লুপা লিশিং ৫০ তৌদুনা শেনগী তেংবাং পীনবগী ৱাফমসু লাউথোকখি। থৌরাং অসিনা রাজ্য অসিগী নৌনা হৌগৎলকলিবা অইবশিংদা মতেং ওইরগনি হায়না মুখ্যমন্ত্রীনা ফোঙদোকখি। রাজ্য অসিগী ইন্দিজেনাস লেঙ্গুয়েজশিং অমসুং কলচর ঙাকশেন্দুনা থম্বা ঙম্নবগী পান্দমদা হীরমসিদা হেন্না মাইওনশিন্দুনা থীজিন হুমজিন্নবগী থবক তৌবশিংদা মতেং পাঙগনি হায়না মহাক্না মখা তানা ফোঙদোকখি।
মীফম অদুদা আসাম সাহিত্য সভা, বোড়ো সাহিত্য সভা, ইন্দিজেনাস ত্রাইবেল সাহিত্য সভা আসাম, দেওরী সাহিত্য সভা, দিমাসা সাহিত্য সভা, অসম নেপালি সাহিত্য সভা, নিখিল রাভা সাহিত্য সভা, কার্বি সাহিত্য সভা, মিসিং সাহিত্য সভা, নিখিল বিষ্ণুপ্রিয়া সাহিত্য সভা, পূর্বাঞ্চল টাই সাহিত্য সভা, তিৱা সাহিত্য সভা, অসম মণিপুরী সাহিত্য পরিষদ, গারো সাহিত্য সভা, মোরান সাহিত্য সভা, অসম চা জণগষ্ঠী সাহিত্য সভা, সোনোৱাল কাছাড়ী সাহিত্য সভা, কুরুখ সাহিত্য সভা, কোচ্ রাজবংশী সাহিত্য সভা, সাওতাল সাহিত্য সভা, মুন্দারী সাহিত্য সভা অমসুং সরনীয়া কাছাড়ী সাহিত্য সভা নচিংবা লূপশিংগী মীহুৎশিংনা শরুক য়াখি।
————————————————————
Get latest News Updates Please Download our Android app CLICK HERE
To Subscribe our YouTube Channel CLICK HERE
————————————————————