লখিপুরওনলাইন দিজিতেল দেস্কঃ আসাম লৈঙাকনা অনৌবা এসওপি পুথোকখ্রে। অকক্নবা জিলা খরদা মপুঙ ফাবা কার্ফিউ থমখ্রে অদুগা জিলা খরদনা কার্ফিউগী মতম কোমথোকখ্রে। মোরিগাঁও, বিশ্বনাথ, গোৱালপারা জিলা অমসুং বোগাঘাত সবদিভিজিনদা মপুঙ ফাবা কার্ফিউ থমখ্রে। অনৌবা চৎন পথাপ অসিগী মতুং ইন্না বরাক তম্পাক্কী কাছার অমসুং করিমগঞ্জ জিলাদা কার্ফিউ মতম পুং ১ কোমথোক্লগা নুমিৎ খুদিংগী নুংথিলগী পুং ২ দগী অয়ুক্কী পুং ৫ ফাওবা কার্ফিউ থমলে। অদুগা দুকান অমসুং লল্লোন ইতিক্কী মফমশিং নুংথিলগী পুং ১ ফাওবা হাংবা য়ারগনি। আসাম লৈঙাক্কী দিজাস্তর মেনেজমেন্ত ওথোরিতিনা পুথোকখিবা অনৌবা এসওপি অসি জুনগী তাং ২৮ নিংথৌকাবা নুমিৎকী অয়ুক্কী পুং ৫দগী খুঙ্গং অমসুং সহর লমদমদা চপ মান্ননা চৎনবা হৌরগনি। অদুগা মখাতানা লাউথোকত্রিফাওবা অথিংবশিং অসি লৈখিগনি হায়রি। কোবিদকী ফিভম খরা শাফরক্লবা বরাক তম্পাক্কী হাইলাকান্দি জিলাদদি কার্ফিউ মতম পুং ৪ কোমথোক্লগা নুমিৎ খুদিংগী নুংথিলগী পুং ৫ দগী অয়ুক্কী পুং ৫ ফাওবা কার্ফিউ থমলে। অদুগা দুকান অমসুং লল্লোন ইতিক্কী মফমশিং নুংথিলগী পুং ৪ ফাওবা হাংবা য়ারগনি। রাজ্য অসিগী গোভর্নমেন্ত অমসুং প্রাইভেত স্কুল কোলেজ ইউনিভার্সিতি শিং ফিজিকেল ক্লাস তৌবা অথিংবা লৈরি। মসিগী মহুত্তা ভার্চুয়েল ক্লাস চৎথগদবনি হায়রি। চয়োলগী কৈথেল, মীফম পাঙথোকপা অমসুং মীয়াম তীনবা থৌরমশিংদসু অথিংবা লৈরি। জিলা অমদগী জিলা অমদা ট্রান্সপোর্ত সার্বিসকী অথীংবা লৈরম্বা অদু মখা তানা অদুমক লৈখিগনি।