লখিপুরওনলাইন দিজিতেল দেস্কঃ কাছার কোলেজ, শিলচরগী এসোসিয়েত প্রোফেসার অমসুং কেমেস্ত্রি দিপার্তমেন্তকী হেদ ডঃ থাংজম পাউলেন মশাগী অনাবা অমনা মরম ওইরগা সেপ্তেম্বরগী তাং ৮ য়ুমশাকৈশা নুমিৎকী নুংথিল পুং ৩ মখায় রোম তাবদা লৈখিদ্রে। ওজা অসিনা লৈখিদবদা মাইগৈ কয়াদগী অৱাবা ফোঙদোক্নরকলি। লৈখিদবা মতম মশাগী চহী ৫৯ শুখ্রে।
ইন্দ্রমনি পাব্লিক হায়স্কুল দগী সেবাগী মখাদা ১৯৭৬ তা মেত্রিক পাস তৌখি, কতন কোলেজতগী পিইউ সাইন্স অদুগা কোলেজ অসিমক্তদগী কেমেস্ত্রি ওনর্স লৌদুনা ১৯৮০ দা বিএসসি পাস তৌখি। গৌহাতি ইউনিভার্সিতগী ১৯৮২ দা কেমেস্ত্রীদা এমএসসি লোয়শিনখি। কাছার কোলেজ শিলচরদা কেমেস্ত্রীগী লেকচরর ওইনা খৃকুমজা ১৯৯৫ দা জোইন তৌখি। ইনওর্গানিক কেমেস্ত্রীনা মহাক্কী স্পেসিয়েলাইজেসননি। ২০১০ দা আসাম ইউনিভার্সিতিদগী পিঐইদি লোয়শিনখি। ৱাতর কেমেস্ত্রী অমসুং ইকোহায়দ্রোলোজি মহাক্কী হৈনবা মাইগৈনি, মরুওইনা বরাক তুরেলদগী দোলফিন (নাসুবী) মাংশিল্লকপগী মতাংদা তোয়না তেংথারম্মী। থৱানমিচাক, উচেক ৱায়াগী মরমদা থিজিনবা, শৈরেং ৱারেং ইবা, শা উচেক ঙাকশেনবীবা মহাক্কী হোবীনি।
ইংলিস, বাংলা, মনিপুরী, আসামিজ নিংথিনা ঙাংঙি ইথোরকপদসু লোনশিং অসিদা অদুম্মক নীংথিনা ইবা ঙম্মী। য়ুমনা শিলচর নতুনপত্তিদনি। অশেংবা ময়ুমদি হায়লাকান্দি লালাদগীনি। খৃকুমজা ১৯৬১ গী জনুৱারী ১৭ তা পোকখি। মহাক চহীসিগী লাক্লিবা ওক্টোবরগী তাং ৩১ অসিদা থবকতগী পোথারগদবনি। মহাক্কী লোয়নবী, মচানিপা অমা মচানুপী অমা লৈহৌরি। https://youtu.be/chVFYMbkeJI