লখিপুরওনলাইন নিউজ দেস্কঃ নহারোল খোরিরোল সিল্লুপ আসামগী চহী ৪৬ শুবা মপোক থৌরম অমসুং চহীগী মীফম খোরিরোল সঙলেন, লখিপুরদা ফেব্রুৱারীগী তাং ২০ নোংমাইজিং নুমিত্তা মখল মখা থৌরমগা লোয়ননা নোংমা চুপ্না পাঙথোকখ্রে। অয়ুকদা লূপকী প্রেসিদেন্ট য়ুম্নাম ইলাবন্তনা লূপকী ফিরাল চীঙখৎতুনা থৌরম হৌদোকখি। মতুংদা য়ুম্নাম ইলাবন্তনা মীফম মপু ওইদুনা পাঙথোকখিবা জেনরেল বোদিগী মীফমনা থোকচোম বিশ্বনাথপু প্রেসিদেন্ট, লৈশুংবম রবীন্দ্র অমসুং কোন্থৌজম নন্দবাবু বু ভাইস প্রেসিদেন্ট অমসুং লখিপুরওনলাইন দিজিতেল দেস্কঃ ৱাহেংবম বিনোয় কুমার বু জেনরেল সেক্রেটরী খন্দুনা মীকোক ১৭ না শাবা অনৌবা থৌসিন কাঙলুপ অমা শেমখ্রে। লোয়ননা মনিপুরী লোনবু আসাম লৈঙাক্কী অনিসুবা অফিসিয়েল লোন ওইনা লৌশিনবিনবা তকশিন, আসাম পাব্লিক সার্ভিস কমিসন অমসুং অতৈ থবক লৌবগী পরিক্ষাশিংদা মনিপুরী লোনগী মফম অমা থম্বীনবা ৱাকৎশিংগা লোয়ননা পুন্না ৱারেপ ১০ খক লৌখি। নুংথিলগী মীফম অফোঙবা মীফমদা মনা য়েন্থোকপগী থৌরম পাঙথোকখি। জিরিবামগী শক্নাইরবা অইবা সরত থোকচোমদা চহীসিগী সোরোকখাইবম মনিকাচান্দ নীংশিং খোরিরোল মনা অদুগা সিঙ্গেরবন্দ লাইকোলগী কবি লৌখাম নন্দকুমার অমসুং বাশকান্দিগী শক্নাইরবী অইবী বদরুল নেছা সাজবমদা চহীসিগী ডঃ নোংথোম্বম নোনিগোপাল নিংশিং সাহিত্য মনা পিদুনা ইকায় খুম্নখি। থৌরমগা মরী লৈননা হন্দক্তা সাহিত্য একাদেমী বাল পুরস্কার ফংলকখ্রবা ডঃ নাওরেম বিদ্যাসাগর অমসুং ক্ষেত্রি নলিনী নীংশিং মনা ফংখ্রবী মোইরাংথেম সোবিতা বু থৌরম অসিদা তরাম্না ওকখি। অফোঙবা মীফমসিদা আসাম ইউনিভার্সিতিগী প্রোফেসার ৱারীবম রঘুমনি না অথোয়বা মীথুং ওইনা ৱা ঙাংখি। অমসুং লূপকী প্রেসিদেন্ত য়ুম্নাম ইলাবন্ত অমসুং ভিপি থোকচোম বিশ্বনাথনা মীফম মপু ওইখি। নুংথিলদা সাহিত্যগী থৌরম অমসু পাঙথোকখি। থৌরমদা অইবা অইবী ১৫ না শৈরেং অমদি ৱারীমচা পাথোকখি হায়না কে নন্দবাবু সিংহগী চেরোল অমদা ফোঙদোরকলি। পাউ অসি ইউটিউবতা য়েংবিউ > https://youtu.be/ENNAnaGnkYk