লখিপুরওনলাইন ডিজিতেল দেস্কঃ নহারোল সাহিত্য প্রেমী সমিতি, ইম্ফালনা কবিরত্ন ডা. লমাবম কমলগী ১২৫ শুবা মপোক কুমওন থৌরম লাংথবাল কুঞ্জদা লৈবা ডা. কমল লিটরেরী কমপ্লেক্সতা মার্চ ৩, ২০২৪ইং নোংমাইজিং নুমিত্তা পাঙথোকখ্রে। কমপ্লেক্স অদুদা খীল্লিবা কবিগী মুর্তিদা হৈ-লৈ কংপা অমসুং শৈরেং শিদিন্নবনা থৌরম অদুগী মপুং ওইবা শক্তম ওইখি। সমিতীগী প্রসিদেন্ট নাউরোইবম ইন্দ্রমনি অমসুং কবি কমলগী মশু ইবুংঙো লমাবম চন্দ্রকান্তনা দাইজগী লৈতেং ওইখিবা খৌরম অদুদা সমিতিগী ভাইস প্রসিদেন্ট য়াইম হাওবমনা থৌরমগী নুংগী ৱারোল পীরদুনা ময়াম্বু তরাম্না ওকথি। লাইওইখ্রবা কবিরত্নগী মশুইবেম্মা বিশ্বপ্রিয়ানা মশানা ইজবা ফজখ্রবা ইংরাজীগী শৈরেং অমা পাথোকতুনা হৌদোকখিবা শৈরেং শৈদিন্নবগী থৌরম অদুদা শক্নাইরবা অইবা ১৯ না মশা মশান ইবা শৈরেংশিং পাথোকখি। চোংথাম সুবদনি, ৱাংখৈরাকপম বিরেন্দ্রজিৎ, রাজকুমার সনাজাওবা, কে গঙ্গারানী, ডা. ইরুংবম দেবেন, লোইতাম ইনাওবী, এল, মধুমঙ্গোল, মাইবম নবকিশ্বর, নিশা বাশী, দোনেশ্বর কোনসম, ওইনাম চিত্তরঞ্জন, বিনোদকুমার শর্মা, ৱাইখোম অমুচৌ, য়াইমা হাওবা, লাইশ্রম মেমো অমসুং অশাংবম নেত্রজিৎ নচিংবনা শৈরেং পাথোকখি। সমিতিগী প্রসিদেন্ত নাউরোইবম ইন্দ্রমনিনা কমপ্লেক্স অসি শেমগৎ শাগৎলকপদা তেংবাংলকখিবা লৈকাই অসিদগী লাংপোকলাকপম মেঘা অমসুং লৈশাংথেম গুনি লোয়ননা সমিতিগী ওফিসকী ইনফ্রাস্ত্রকচরগী অৱাৎ অপা মতেং পাংবীরিবা ডা. কমলগী থিজিল্লোই ডা. লাইরেনলাকপম সরতপূসু অচম্বা খুদোল পীদুনা ইকাইখুম্নবা উৎখি। সমিতিগী জেনরেল সেক্রেটরী ডা. হুইরেম তেম্বনা লেঙবিরকপশিংবু থাগৎ ৱারোল পীরদুনা থৌরম লোইশিনখি। ডা. কমলঃ পুন্সি অমসুং মঙলান হায়বা লাইরিক্কী অইবা ডা. এল. সরতনা তিনখিবা মীপুম খুদিংমক্তা লাইরিক অসিগী বঙ্গালি অমসুং মীতে ময়েক খুৎনম অনীমক লেম্না য়েন্থোকতুনা ফংহনখি।