 |
| Hegra Conference 2020 দা শরুক য়াখিবা নোবেল মনা ফংখ্রবশিংগা লোয়ননা অতৈ মালেমগী শক্নাইরবা মীওইশিং |
নোবেল মনা ফংখ্রবা মালেমগী শক্নাইরবা মীওই ১৮না শরুক য়াখিবা Hegra Conference 2020 লোইশিনখ্রে।
অৱাং নোংচুপ থংবা আরবকী আলউলাগী হেগ্রাদা নুমিৎ হুমনি চুপ্না চৎথরকখিবা নোবেল মনা ফংখ্রবশিংগী ওইবা Hegra Conference 2020 হায়না মীংথোনবা মালেমগী অপুনবা মীফম অমা মায়পাক্না লোয়শিনখ্রে। মীফম অসিদা শান্তি, শেনমিৎলোন, সাহিত্য, ফিজিক্স, কেমিস্ত্রি, হকশেল অমসুং মেদিসিনগী লমদা নোবেল মনা ফংখ্রবা মালেমগী শক্নাইরবা মীওই ১৮না শরুক য়াখি।
মীওইবা জাতিগী ওইরকলিবা ফিভম, মালেমগী চাউখৎ থৌরাং অমসুং মসিগী পোরম থিবগী মতাংদা মালেমগী তোঙান তোঙানবা লৈবাক ৩২দগী সমাজিক অমসুং রাজনিতিগী নেতাশিংসু হায়রিবা Hegra Conference 2020 অসিদা শরুক য়াখি। সৌদি আরবকী সংস্কৃতি মন্ত্রী অমসুং আলুলাগী রোয়েল কমিসন (আরসিইউ) গী রাজ্যপাল বদর বিন আবদুল্লাহ বিন ফারহান না থৌরম অসি সিল্লাংখি।
চহি কয়াগী মমাংদগী হৌরদুনা আলউলা হায়রিবা মফম অসিদা মালেমগী তোঙান তোঙানবা ধর্ম, সংস্কতিগী ৱাখল্লোন কয়ানা জ্ঞানগী পুক্কৈদা পীথোক পীশিন তৌনদুনা লাক্লি অমসুং ঙসিসু মফম অসিদা পুল্লরে হায়না বদর বিন আবদুল্লাহ বিন ফারহাননা থৌরমদা মহাক্কী হৌদোক ৱারেল ফোঙদোকখি। Hegra Conference গী মরুওইবা পান্দমদি তুংলমচৎতা ওইরক্কদবা মালেমগী ওইবা লাইরিক-লাইশুগী ফিভম, হকশেল, লৌউ-শিংউ অমসুং শেনমিৎলোনগী মতাংদা তাংদাংবা পোরম অমা হেন্না অৱাংবা থাক্তা য়াৎথোকতুনা থমহৌবা হায়বসিনি। মীফমগী লোইশিল্লকপদা মালেমগী থাক্তা শেন পূবা (গ্লোবেল দেব্ট) গী ওইবা মীফমলেন অমা শিল্লাংবা, মালেমগী থাক্তা ঐইদস্ কী লমদা থিজিন হুমজিনবা, মীদল ইস্ট সাইন্স ফান্দ (এমইএসএফ) শেম্বা হায়না ৱারেপ্নখি।
ইউনেসকোগী ৱার্লদ হেরিতেজ সাইত অমসু ওইরিবা সৌদি আরবিয়াগী আলউলাদা জনুৱারীগী ৩০ দগী ফেব্রুৱারীগী তাং ২, ২০২০ ফাওবা পাঙথোকখিবা Hegra Conference 2020 গী হন্দক্কী থীমদি “Transmission – A Shared Heritage” নি।
রিয়াদতগী কিলোমিতর ১১০০ রোম চৎলগা লৈবা বর্গ কিলোমিতর ২২,৫৬১ না কোনবা মফম অসিদা নুঙতগী ওইবা ৱাংল-ৱাংলবা চীং, তোপ তোপনা ফজরবা প্রকিতিগী ওইবা শক্তম কয়া হৌজিকসু লেঙদনা লৈরি। মফম অসি চহি লিশিং কয়াগী মমাংদা লিহয়ান অমসুং নবটিয়ানশিংনা লৈঙাক্লম্বা মফমনি। আলউলাগী মনুংদা হেগ্রানা খ্বাইদগী মমিং লৈরবা সহরনি । মসিদা চাউখ্রবা নুঙনা ককতুনা নিংথিনা শেমশাদুনা থমলবা ফজরবা টোম্ব চামরোম লৈরি। Hegra অসি খৃঃ কুমজা ২০০৮ তা ইউনেসকোনা ৱার্লদ হেরিতেজ সাইত অমা ওইনা শকখঙখি।