বরাক তম্পাক্কী
খোমজিনবা পাউ
২০–১০–২০১৯
ট্রাইবেল নুপীমচা অমবু ফম্লানবীরগা হাত্তোকপনি হায়বগী মতাংদা মীওই ৩ ফারে।
⧭⧪➤ ধোলাই থানাগী মনুং চনবদা লৈবা বাগবাহার খুঙ্গংগী মশাগী চহী ১৭ রোম শুরবী ট্রাইবেল নুপীমচা অমবু ফম্লানবীরগা হাত্তোকপনি হায়বগী চীংননিঙাই ওইবা মরালদা হৌখিবা ইরাই নুমিৎ কাছার পুলিসনা মীওই অহুম ফাগৎখ্রে। ফাগৎলবা মীওইশিং অদুদি বিশ্বজিৎ দাস, সোমিরন দাস অমসুং মচানুপা শিশির দাস নি। পুলিসনা হুই পুথরকতুনা থী হুম্বগী থবক চৎথরবা মতুংদা মখোয়শিং অদু ফাগৎখিবনি অমসুং মখা তানা লংলা লংজীনগী দমক ৱাহং পাউহং চৎথরি। অসোমদা থৌদোক অদুগী মতুংদা হৌখিবা শগোলশেন নুমিত্তা ধোৱারবন্দগী বিশ্বজিৎকী মনাউ নুপা রাজেন দাস কৌবা মীওই অমা থৌরি য়ান্দুনা শিরম্বা থেংনখি। হীরম অসিগী মতাংদা বরাক ভেলী ইন্দিজিনাস ইথনিক পিপলস্ কোওর্দিনেসন কমিতিগী মীহুৎ কাঙবু অমনা লৈখিদ্রবগী ইমুং মনুংগী মীওইশিংগা উন্নদুনা অশেংবা লংলা লংজিন পুথোকতুনা মতীক চাবা চৈরাক পীহন্নবা মরী লৈনবা মীওইশিংগী মফমদা তকশিনখি। থৌদোক অসিগী মতাংদা পেন্দবা ফোঙদোক্লদুনা ইন্দিজিনাস স্টুদেন্টস্ অর্গেনাইজেসন, বরাক ভেলী মার স্টুদেন্টস্ এসোসিয়েসন, মার নেসনেল ইউনিওন নচিংবা লূপশিংনা ঙরাং কাছার দিসি অফিস মমাংদা পেন্দবগী খোল্লাউ লাউখি। লোয়ননা লৈখিদ্রবগী ইমুং মনুংদা লুপা লাখ ২০ ক্ষতিপূরন পীবা অমসুং থৌদোক অসিদা চেন্নবা মীওইশিংবু ফাঁসিগী চৈরাক পীনবা দাবী তৌখি। পাউগী লিখুন মতুং ইন্না মার নুপীমচা অদু প্রাইভেট টিউসনদগী হল্লকপগী লম্বীদা ফাদুনা পুখ্রগা মনাক নকপদা লৈবা উমংদা মখোয় ময়ামনা নুপীমচা অদুবু ফম্লানবিরবা মতুং হাত্তোক্লগা ইশিং খোঙ অমদা লংথোক্লম্বনি হায়রি।
লোৱার হাফলোংদা দুকান ১২ মৈনা তুম্না চাকখ্রে।
⧭⧪➤ হৌখিবা ইরাই নুমিৎ হাফলোং সহরদগী কিলোমিটর অহুমলোম চৎলবা লৈবা মফম অমদা লৈবা দুকান ১২ পুল্লপ্না মৈনা তু্ম্না চাকখ্রে। অহিং নোংয়াইদা হৌরকখিবা থৌদোক অদুদা দুকান অদুগী মনুংদা লৈবা ওটোরিক্সো অমসু মৈনা চাকপদা য়াওখি। ।(www.lakhipuronline.in)
নহারোল খোরিরোল সিল্লুপনা মনিপুরী শৈরেংগী নুমিৎ পাঙথোকখ্রে।
⧭⧪➤ হৌখিবা ওক্টোবরগী তাং ১৩ নোংমাইজিং নুমিৎ মেরাগী পূর্ণিমা নুমিৎতা নহারোল খোরিরোল সিল্লুপ, অসম লখিপুরগী শঙলেন্দা মনিপুরী শৈরেংগী নুমিৎকা মরী লৈননা শৈরেং পাবগী থৌরম অমা পাঙথোকখ্রে। শিল্লুপকী সভাপতি য়ুম্নাম ইলাবন্ত সিংহনা মীফম মপু ওইদুনা পাঙথোকখিবা কবি সন্মেলন অদুদা কবি ১৭ না মখোয়গী শৈরেং ৪৫ রোম পাথোকখি। ডাঃ কমল না খৃঃকুমজা ১৯৩৯ দা মহাক্কী “লৈ পরেং” ফোঙদোকখিবা মেরাগী পূর্ণিমা নুমিৎপু নিংশিংদুনা হৌখিবা চহী অহুম মমাংদগী হৌদুনা নুমিৎ অসিবু মনিপুরী শৈরেংগী নুমিৎ হায়না ঙাকতুনা লাকখিবনি। ।
কামরাঙ্গাদা ইমোইনু চা মনা পুথোকপা হৌখ্রে।
⧭⧪➤ লখিপুর সাবদিবিজনগী মনুং চনবদা লৈবা কামরাঙ্গা পার্ট টু দা লৈবা ইমোইনু এন্টরপ্রাইজেসগী মপু লোংজম ববাসনাগী মশাগী সঙ্গাইদা ইমোইনু ইভরগ্রীন সোসাইটিগী ইউনিট অমা ওইনা “ইমোইনু টি” হায়বা চা মনাগী পেকেজিং প্রোদাক্ট অমা হৌখিবা ওক্টোবরগী তাং ১৪ দা লোঞ্চ তৌখ্রে। ইমোইনু এন্টরপ্রাইজেসকী ফেক্টরী অসিদগী পুথোক্লিবা প্রোদাক্ট অসিগী চা মনা অসি পাল্লারবোন্দ চা বাগানদগী লৌরগা শেম্বনি। মীতৈশিংগী খুদোং চাদবা কয়া য়েংলগা অওনবা পুরক্নবগী পান্দমদা পায়খৎপা থৌরাংনি, মার্কেট য়াম্না চাওই শোয়দনা মায়পাক্কনি হায়বগী থাজবা লোংজম ববাসনা না ফোঙদোকখি।
শকখঙদবা নুপীগী অশিবা হকচাং অনি ফংলে।
⧭⧪➤ দূর্গা পূজা মতুংদা ওইরকপা থৌদোক ৱাথোকশিংগী মনুংদা অতোপ্পা পাউ অমদা য়াম্না চীংননিঙাই ওইরবা মওংদা হৌখিবা থাংজা নুমিৎতা কাছার জিলাগী চাটলা লমদমদগী নুপীগী অশিবা হকচাং অনি লৌখৎলে হায়রি। নুপী অমনা চহী ৪০ রোম ওইগনি অদুগা অতোপ্পা অমদুনা চহী ১৫ মখাগী নুপী ওইগনি হায়রি। মখা তানা থীজিন্নবগী দমক অশিবা হকচাং অনিমক পোস্ট মোর্তেমগী দমক শিলচর মেদিকেল কোলেজ দা থাখ্রে। www.lakhipuronline.in)
রাজ্যগী বিধানসভা সিট মরিগী হয়েং পাঙথোক্কদবা মীখলগী শেমশাবা লোইরে।
⧭⧪➤ হয়েং নিংথৌকাবা নুমিৎ করিমগঞ্জকী রাতাবারী য়াওনা সোনারী, জোনিয়া, রাঙ্গাপারাদা পাঙথোক্কদবা মরক্কী মীখলগী দমক শেমশাবা লোয়রে। হন্দক্কী মীখল অসিদা পুন্না মীরেপ ২০ না লম্বা তৌনরি। ভোত থাদফম কেন্দ্র ৮২০ দা পুন্না ভোটর লাখ ৬ লিশিং ৭৮ গা ৭৯৮ না মীরেপ কুনগী মরাইবক লেপকদৌরি। কেন্দ্র পুম্নমক্তা বিজেপী অমসুং কংগ্রেসনা মখোয়গী মীরেপ পীরবসু এআইইউদিএফ দোল না মখোয়গী দোলনা জোনিয়া কেন্দ্র খক্তদা মখোয়গী মীরেপ চোংথোক্লি। মীখলগী নুমিত্তা ইলেকসন কমিসননা মখল খুদিংমক্কী একজিট পোল পীবদা অথিংবা থমলি। হয়েং অয়ুক্কী পুং ৭ তগী নুংথিলগী পুং ৬-৩০ ফাওবা ভোত থাদনগনি। অক্টোবরগী তাং ২৪ ভোট মশিং থীগনি।(www.lakhipuronline.in)
Pao sing asi ga loinana atei e-pao gi damak