ভারতকীসু মশাগী স্পেস স্তেসন অমা থম্নবা থবক পায়খৎপা হৌরগনি। ভারতকী নোংথকলোন থিজিল্লোইশিংগী কাংবু ইন্দিয়ান স্পেস রিসার্স ওর্গেনাইজেসন (ইসরো) না মতম অমত্তদা অচৌ অচৌবা প্রোজেক্ট কয়া পায়খৎনবা শেম শারি। অসোমদা ইসরোগী থিজিল্লোইশিংনা চন্দ্রয়ান-২ গী লেন্দার বিক্রমগসু পাউ ফাওননবা হোৎনবা য়াবা থবকশিং লেপ্তনা হোৎনরি। ভারতনা পায়খৎকদৌরিবা প্রোজেক্টশিংগী মনুংদা মী য়াওনা থাগৎকদবা ভারতকী অহানবা মিসন গগনয়ান গীদমক থবক হৌরে।
ভারতনা মশাগী স্পেস স্তেসন অমগী থবক পায়খৎলগনি হায়না ড. কে সিবান না ফোঙদোকখিবা লৈখ্রে। থৌরাং অসিগী দমক ইসরোনা মথংগী চহীদা স্পেস ডোকিংগী চাংয়েং অমা পাঙথোক্কনি। মসিগী দমক ভারতনা রোকেট অমত্তদা অমুক্তদা সেটেলাইট অনি সুন্দ্রংদা থাগৎকনি।
মাইক্রোগ্রেভিটি য়াওনা তোঙান তোঙানবা বিজ্ঞানগী চাংয়েং কয়া পাঙথোক্কদৌরিবা স্পেস স্তেসন অসি চাওরাক্না টোন কুনরোম লুমগনি। মসি খুদিংমক অসি ২০২১ গী দিসেম্বরদা থাগৎনবগী পান্দম থমলিবা গগনয়ান মিসন হায়নসু খঙনরিবা হিউমেন স্পেস ফ্লাইট প্রোগ্রাম অসিগী মখা পোনগনি হায়না ড. সিবান না ফোঙদোকখি। স্পেস স্তেসন থম্বগী আসা অসিনা মায় পাক্লগদি মশাগী স্পেস স্তেসন লৈবা লৈবাকশিং রাসিয়া, ইউ এস অমসুং চাইনাগী মতুংদা ভারতনা মরিসুবা লৈবাক ওইরগনি।