লখিপুরওনলাইন ডিজিতেল দেস্কঃ নেসনেল ইন্সতিতিউত অফ তেক্নোলোজি এনআইটি শিলচরগী মহৈরোয় অমা গেস্ত হাউসকী বাথরুম অমদা থৌরী য়ান্দুনা শিরমলে। চহী ২০ গী কিশোরপ্রাণ ডেকা, অপোকপা মোহিন ডেকা মেকানিকেল ব্রাঞ্চকী সিক্স সেমিস্তারগী মহৈরোয়নি। ময়ুমনা কামরূপ রুরেলগী তামুলপুর পুলিস স্তেসনগী মনুং চনবা বোরকাদগীনি হায়রি।
থৌদোক অসিগী মতাংদা ঙসি নিংথৌকাবা নুমিৎকী অয়ুক্কী পুং ১১ দা পুলিসনা পাউ ফংবদগী অসিবা হকচাং লৌথোকতুনা শিলচর মেদিকেল কোলেজতা পোস্ত মোর্তেম পাঙথোকখি। পাউগী লিখুন মতুং ইন্না মহৈরোয় অসি একিউত্ দিপ্রেসন লৈবনা মমা মপাগা লোয়ননা গেস্ট হাউসতা লৈবনি হায়রি।
মহৈরোয় অসিগী এন্দ সেমিস্তরগী পরিক্ষাসু ঙসিদগী হৌবগী ৱা লৈরম্বনি হায়রি। হীরমসিগী মতাংদা পুলিসনা থীহুম্বগী থবক মখা চত্থরি। পনবা য়াই, এনআইতিদা মহৈরোয়গী অসুম্না মশা মথন্ত শিবগী থৌদোক অসি মসিনা অনিসুবনি মমাংগী চহীদসু অরুনাচল প্রদেসকী কোজ বুকের কৌবা থার্দ ইয়ার ইলেক্ত্রিকেল ইনজিনিয়ারিংগী মহৈরোয় অমা মহাক্কী হোস্তেল রুমদা শিদুনা লৈরম্বগী পাউ লৈখি।
অসিগুম্বা থৌদোক অসিনা মরম ওইরগা মহৈরোয়শিংবু মমা মপা ওইবাসিংনা মতম চুপ্পদা কদায়দা করি তৌরিবগে হায়বদু য়াম্না চেকসিন্না মমাং থাবদগী য়েংশিনবা মথৌ তায় হায়বা ৱাফম মীয়ামনা ফোঙদোক্নরি।