লখিপুরওনলাইন ডিজিতেল দেক্সঃ কাছার লখিপুর সাবদিবিজনগী মনুং চনবদা লৈবা সাপোরমোইনা হায়স্কুলগী পোত্থারবা হেদমাস্তর ইঙুদম জিতেন্দ্র মশাগী অনাবা অমনা মরম ওইরগা দিসেম্বরগী তাং ১৬ ইরাই নুমিৎ ঙরাং অয়ুকতা গুৱাহাতিগী হোসপিতাল অমদা লৈখিদ্রে। লৈখিদবা মতমদা মশাগী চহী ৭৫ শুখ্রে। হৌখিবা থা খরা অসি মহাক গৌহাতিদা লায়েংদুনা লৈরকখিবনি। মহাক্কী অরোয়বা মথৌ মঙম মশাগী ময়ুম লখিপুর খুমনদা ঙসি পাঙথোক্লগনি। ওজা অসিগী লোয়নবী ইঙুদম ওংবী বিমোলা দেবী, মচানিপা অমা মচানুপী ২ লোয়ননা মনাউনিপা ২ অমদি মচননুপী ৪ লৈহৌরি। মনাউনিপা ইঙুদম তরুনকুমার সেন্ট্রেল এক্সাইজকী পোত্থারবা এসিস্টেন্ট কমিসনারনি অদুগা মনাউ অতোম্বা ইঙুদম শ্যামসুন্দর এপিদিসিএলগী সিনিওর এসিস্তেন্ট ইনজিনিয়ারনি। ১৯৬৫ দা মেত্রিক, ১৯৬৯ দা বিএ অদুগা মতুংদা বিএদ দিগ্রীসু লৌখি। মতম শাংনা সাপোরমোইনা হায়স্কুলদা ওজা ওইরম্লবা মতুং ২০০৯গী ওক্টোবরগী ৩১ দা হেদমাস্তর ওইনা থবক্তগী পোত্থাখি। অজা অসিনা আসামগী মনিপুরী মহৈরোয়শিংগী দমক্তা পুথোকপীরম্বা ইংলিস গ্রামার লাইরিক মীয়াম্না থোইদোক্না পাম্নবা গ্রামার লাইরিক অমা ওইখি। ওজা অসিনা লৈখিদবদা সাপোরমোইনা হায়স্কুলগী ওজাশিং মহৈরোয়শিং, লখিপুর খুমন ক্লাব, খুমন অরিবম শীংলূপ নচিংবনা অৱাবা ফোঙদোকখ্রে। লখিপুর অহল মরূপকী মেম্বরসু ওইরম্বা ওজা অসিনা খঙহৌদনা লৈখিদবদা লূপকী প্রেসিদেন্ট থোইদিংজম ধীরেন্দ্র অমদি থৌবুরেন ইঙুদম বিনোদনা অৱাবা ফোঙদোরকলি।