লখিপুরওনলাইন ডিজিতেল ডেস্কঃ ত্রিপুরাগী শক্নাইরবা সোশ্যাল এক্টিভিস্ট রাজকুমার কমলজিৎ সিংহগী চহী চামশুবা মপোক কুমওন পালন তৌবগী থৌরম বাংলাদেশ মণিপুরী সাহিত্য সংসদ (বামসাস) না শিল্লাংদুনা ২৫ ওক্টোবরদা বাংলাদেশকী সিলেটকী শাপমলৈকাইদা লৈবা বামসাসকী ওফিস হোলদা পাঙথোকখ্রে।
বামসাসকী প্রেসিডেন্ট কবি এ কে শেরামনা ময়ায় তাংবল লৌদুনা অমসুং সেক্রেটারি নামব্রম শংকরনা কনডাক্ট তৌবা থৌরমদুদা সিলেট সাহিত্য পরিষদকী প্রেসিডেন্ট কবি পুলিন রায়, বিশ্ববাংলা সাহিত্য ও সাংস্কৃতিক পরিষদকী প্রেসিডেন্ট রাহনামা শাব্বির চৌধুরী মনি, বিশ্ববাংলা সাহিত্য ও সাংস্কৃতিক পরিষদকী ভাইস প্রেসিডেন্ট সেনুয়ারা আক্তার চিনু অমসুং সিলেট লেখিকা সংঘগী জেনারেল সেক্রেটারি ইশরাক জাহান জেলি-না গেস্ট ওব ওনার ওইনা শরূক য়াখি। রাজকুমার কমলজিৎকী শক্তমদা হৈকৎ লৈকৎ তৌদুনা শ্রদ্ধা উৎলবা মতুঙদা অহানবদা কবি এ কে শেরামনা রাজকুমার কমলজিৎ সিংহগী শম্লপ্পা পুন্সি ৱারি পাদুনা তাহনখি অমসুং ওজা অসিগা ১৯৭১ দা বাংলাদেশকী নিঙতম লানগী মতমদা অমসুং মথংদা কয়ারক উন্নখিবগী স্মৃতি নিংশিংদুনা ৱা ঙাঙখি।
থৌরমদুদা আলাউদ্দিন তালুকদার, উত্তম কুমার চৌধুরী, আবদুর রহমান হীরা, এল. প্রশান্ত কুমার সিংহ, ওয়াই. নৃপেন্দ্র সিংহ, নীহার রঞ্জন শর্মা, কেএইচ. সমেন্দ্র সিংহ, এম. খির সিংহ নচিংবা মীওইসিংসু ৱা ঙাংখি। থৌরমগা মরী লৈননা থোকচোম ওংবী কৈনাহান দেবী, রওশন আরা বাঁশি খূৎহৈবম, সোরাইজম অনিতা, শহিদুল ইসলাম লিটন নচিংবা মীওইসিংনা শৈরেং পাথোকখি। অরোইবদা তীনখিবা মীয়ামনা শক্নারবা রাজকুমার কমলজিৎ সিংহগী স্মৃতিদা শ্রদ্ধঞ্জলি কৎখি।