কোর্দিনেসন কমিতি ফোর প্রোতেক্সন অফ মনিপুরী লেঙ্গুয়েজকী মীহুৎ কাংবুগা শিলচর সার্কিত হাউসতা ফম্মিন্নদুনা ৱারী শান্নখ্রে।

লখিপুরওনলাইন ডিজিতেল দেস্কঃ  আসামদা হৌজিক হৌজিক ওইরিবা মনিপুরী লোনগী ওইরক্লিবা চৈথেং কয়া অসিগী মতাংদা শিলচরগী এমপি দাঃ রাজদীপ রায় অমসুং আসাম এসেম্বলিগী দেপুতি স্পীকর, সোনাইগী এমএলএ আমিনুল হোক লস্কর অমসুং বিজেপী কাছার দিস্ট্রিক প্রেসিদেন্ট কৌশিক রায়গা লোয়ননা কোর্দিনেসন কমিতি ফোর প্রোতেক্সন অফ মনিপুরী লেঙ্গুয়েজকী মীহুৎ কাংবুগা ঙরাং ৮/৯/২০২০ নুমিদাংৱাইরম শিলচর সার্কিত হাউসতা ফম্মিন্নদুনা ৱারী শান্নখ্রে।

 মনিপুরী লোনবু আসামগী এসোসিয়েত অফিসিয়েল লেঙ্গুয়েজ ওইহনগদবনি হায়বগী লেপ্তনা চংশিল্লকপা খোংজং অসিদা রাজ্য সরকারনা মীৎয়েং চংবিনবগী পান্দমদা উন্নদুনা ৱারী শান্নবা অদুদা কোর্দিনেসন কমিতিগী কোর্দিনেতর আসাংবম স্বপন না তাল্লিবা দিমান্দশিংগী মরীক চুম্বা পাওম্লদুনা আসাম গোবমেন্টকী অনৌবা আইননা মরম ওইরগা আসামগী অফিসিয়েল লেঙ্গুয়েজ অহুম আসামিজ নত্রগা বেঙ্গলী নত্রগা বোরো লোন ইবা পাবা
ঙমদ্রবদি এপিএসসি গী কম্বাইন্দ কম্পিতেতিব পরিক্ষা অমসুং অতৈ থবকশিং থাবগী অয়াবা লৈত্রৈ মসিমক্তনা মনিপুরী লোন আসাম সরকারগী অফিসিয়েল লেঙ্গুয়েজ ওইহন্নবা দাবী তৌবনি হায়না আসাংবম স্বপননা ফোঙদোকখি। 

এমপী দাঃ রাজদীপ রায়না থবক্কী মতাংদা মনিপুরী কেন্দিদেতশিংনা ফংলিবা চৈথেং অসিগী মতাংদা ৱারোইশিন অমা পুরক্নবা মহাক্কী মাইগৈদগী
আসাম সরকারগা ৱারী শান্নগনি হায়খি। কৌশিক রায়না হীরম অসিগী মতাংদা মহাক্না মমাং থাবদা মহৈমশিংগী মন্ত্রী হিমন্ত বিশ্ব শর্মাগা ৱারী শান্নখিবা মতমদা এপিএসসি অমসুং অতোপ্পা থবকশিংগী মতাংদা সোলিউসন অমা পুরক্নবা হোৎনগনি
হায়বগী ৱাফম ফোঙদোরকখিবগী মতাংদা মহাক্না পাউদমখি অমসুং হীরমসিগী মতাংদা রাজ্যগী মহৈমশিংগী মন্ত্রীনা হন্দক বরাক তম্পাক্কী খোংচৎতা লাক্কদবা অসিদা কুপ্না ৱারী শান্নবগী খুদোংচাবা লৌসি হায়না মহাক্না ফোঙদোকখি। আমিনুল হোকনসু হীরম অসিগী মতাংদা মহাক্কী মাইগৈদগীসু চপ চানা সাপোর্ত তৌদুনা ৱারোইশিন পুরক্নবা হোৎনবদা শরুক য়াগনি হায়খি।

এসোসিয়েত অফিসিয়েল লেঙ্গুয়েজ তানবগী মতাংদদি রাজ্য অমসুং কেন্দ্র সরকারগা তানদুনা ওইহন্নবা হোৎনগদবনি হায়না দাঃ রাজদীপ রায়না মহাক্কী ৱাফম থম্বিখি। কৌশিক রায়না হীরমসিগী মতাংদা রাজ্যগী মহৈমশিংগী মন্ত্রীনা হন্দক বরাক
তম্পাক্কী খোংচৎতা লাক্কদবা অসিদা কুপ্না ৱারী শান্নবগী খুদোংচাবা লৌসি হায়না মহাক্না ফোঙদোকখি। বিজেপী আসাম স্তেত
কমিতিগী একজিকিউতিব মেম্বর রীনা সিংহ য়াওনা হোৎনবিদুনা উন্নখিবা অদুদা পোথারবা অজা ইঙুদম বিনোদ, লখিপুর তাউন কমিতিগী এক্স ভাইস চেয়ারমেন লৈশুংবম রোবিন্দ্র, আসাম মনিপুরী মুসলিম য়ুথ ফ্রোন্ত কী জেনরেল সেক্রেতরী আব্দুল নুর খান, আসাম মনিপুরী মৈরা পায়বী অপুনবা লূপ আমপালগী প্রেসিদেন্ট অহোংসাংবম লিলি, মায়ফাগী জেনরেল
সেক্রতরী অক্রম লখিকান্ত, ওল আসাম মনিপুরী মুসলিম স্টুদেন্টস্ ইউনিওন গী জেনরেল সেক্ত্রেটরী হাসান চৌধুরী, নোংইনগী প্রেসিদেন্ট চীঙাখম বিশ্বজিৎ, মায়ফাগী প্রেসিদেন্ট সেরাম হেরাজিৎ, মনিপুরী মুসলিম দেভলপমেন্ট ওর্গেনাইজেসন আসাম গী ওর্গেনাইজিং সেক্রেটরী হুসাম উদ্দিন চৌধুরী অমসুং জমির নচিংবা মীওইশিংনা শরুক য়াখি।