লখিপুরওনলাইন দিজিতেল দেস্কঃ কাছার জিলাগী পোয়লাপুল কমিউনিতি হোল দা সেপ্তেম্বরগী তাং ১৮ নোংমাইজিং নুমিত্তা ওল মনিপুরী মুসলিম মৈরা পায়বী সংস্থা গী অহানবা মপোক কুমওন থৌরম পাঙথোকখ্রে। সংস্থাগী প্রেসিদেন্ট সঙ্গীতা বেগম না মীফম মপু ওইদুনা ফমখিবা মীফমদা খৈরুন নেছা চৌধুরী চীফ এদভাইজর, ওল মনিপুরী মুসলিম মৈরা পায়বী সংস্থা চীফ গেস্ট ওইনা শরুক য়াখি। থৌরমদা গেস্ট অফ ওনর ওইনা লখিপুরগী এমএলএ শ্রী কৌশিক রায়গী মীহুৎ শ্রী সনজোয় ঠাকুর প্রেসিদেন্ট বিজেপী লখিপুর, কাবিল হুসেন মাইনোরিতি চেয়ারমেন বিজেপী, দেমা খান জিপি প্রেসিদেন্ট, সেরাম হেরাজিৎ এদভাইজর মাইফা, আনুৱার আলি মাইনোরিতি ভাইস চেয়ারমেন, হসিনা বেগম চৌধুরী, জিয়াঊল ইসলাম, আব্দুল নূর খান নচিংবনা দাইসতা ফমখি। থৌরমগী ৱাহৌদোক পীরদুনা জুবেদা বেগম জেনরেল সেক্রেটরী ওল মনিপুরী মুসলিম মৈরা পায়বী সংস্থা না হায়খিবদা ঐখোয়গী মৈরা পায়বী অসিনা হেক হৌরকপদগী মীয়ামগী অমদি মৈতৈ পাঙল নুপীশিংগী য়াইফনবা থবক থৌরম কয়ামরুম পায়খৎতুনা লাকলি মতুংদসু তৌখিগনি অদুনা আসামদা চোয়না চোয়না খুন্দারিবা মৈতৈ পাঙল খুন খুনগী নুপী ওইবীশিং মৈরা পায়বী সংস্থা অসিদা শরুক য়াবিদুনা ঐখোয় পুন্না মৈতৈ পাঙল সমাজপু আসামদা থৌনা লিংজেল চপ মান্ননা লৈ হায়বসি উৎপগী মতম য়ৌরে হায়খি। দেমা খান না ঐখোয় আসামদা মশিং য়াম্না লিকপা ফুরূপ অমনি অদুনা ঐখোয়গী মরক্তা পোলিতিকেলগী খুদোং চাবা লৌনবগী দমক মৈরা পায়বী অনি থোকহনবসি নুঙাইতে অদুনা ঐখোয় অমত্তা ওইনা চৎমিন্ননবা হোৎনমিন্নসি হায়খি। সেরাম হেরাজিৎ না হায়খিবদা ঐখোয় ইমা অমত্তগী মচানি অদুনা ঐখোয় অমনা অমগী মতেং পাংমিন্নদুনা অপুনবগী লিচিং অমা পুরকপগী মতম য়ৌরে। মৈতৈ পাঙল ইমাশিংনা অফবা ইচাশিং শেমদুনা অৱাং থাক্কী মহৈ মশিং তমহন্দুনা অফবা চাউখৎপা ফুরূপ অমা শেমদুনা অচৌবা থৌদাং লৌবা তঙাইফদে হায়খি। আসামদা ঐখোয়গী ইমালোন শিদরকপা অসি ঐখোয় ইমা অম অমত্তগী মচা ওইরিবা ঐখোয়না পুন্না কনমিন্নবগী মতমনি, অদুনা আসামদা ঐখোয়গী ইমালোন অসিবু এসোসিয়েত অফিসিয়েল লোন ওইহন্নবগী দমক ঐখোয়গী ইমাশিংনা মতেঙ পাঙবিয়ু হায়খি। জিয়াউল ইসলাম না ঐখোয়গী ইচা ইনাউশিংবু অফবা মহৈ মশিং তমহনবা মতমনি, নুপীওইবিশিংগী ওইবা লো কয়াগী মতেং লৌদুনা নুপীশিংবু থৌনা হাপ্পদা মৈরা পায়বিশিংনা সরুক য়াবিউ হায়খি। এমএলএগী মীহুৎ ওইনা শরুক য়াখিবা শ্রী সঞ্জয় ঠাকুরনা হায়খিবদা মনিপুরী মুসলিম নুপীশিংনা সমাজকী দমক অফবা থবক তৌগনি হায়না থোক্লকপসি য়াম্না চাওথোকনিঙাইনি অদুনা ঐনসু এমএলএগা ৱারী শান্নদুনা হেন্দলুম দিপার্তমেন্টকী খুত্থাংদা কান্নবা কয়ামরুম পীনবা হোৎনমিন্নসি হায়খি। থৌরমদা শরুক য়াখিবা শিংনা মৈরা পায়বিশিংগী থৌনাবু শিংথাদুনা ৱাহৈ কয়ামরুম ফোঙদোক্নখি। থৌরমগী অরোইবদা সংস্থাগী প্রেসিদেন্ট সঙ্গীতা বেগম না প্রেসিদেন্টকী ৱারোল পীরদুনা হায়খিবদা ঐখোয়সি মশিং লিকচরবসু থৌনা লৈবা জাতিনি অদুনা ঐখোয়গী মৈরা পায়বীনা মনিপুরী খুনাইগী দমক অঙম্বা মতেঙ পাঙগনি হায়খি। ওল মনিপুরী মুসলিম মৈরা পায়বী সংস্থাগী এদভাইজর রেহান উদ্দিন না মীয়াম্বু থাগৎ ৱাহৈ পীখি। থৌরমদা আব্দুল হামিদ, সলিম নোংয়াই, সলাউ উদ্দিন, নসিব উদ্দিন চৌধুরী নচিংবা মীওই কয়ানা শরুক য়াখি। লোয়ননা মৈতৈ পাঙল খুন ১৫ রোমগী মৈরা পায়বী সংস্থাগী মেম্বরশিংনা শরুক য়াখি হায়রি। https://www.youtube.com/c/Lakhipuronline