মনিপুরীসিংগী লোল অমদি ময়েক চাওখৎহন্নবা অখন্নবা থৌরাং লৌখৎপিরকপদা মীলাল কংলৈপাক না আসাম লৈঙাক্কী মফমদা থাগৎপা ফোঙদোরকলি

লখিপুরওনলাইন ডিজিতেল দেস্কঃ মীলাল কংলৈপাকনা মনিপুরদতা নত্তনা মপাল লম য়াওনা চোইনা তাখ্রবা মনিপুরীসিংগী লোল অমসুং ময়েক চাউখৎহন্নবা চংশিল্লকপা খোংজংগী মনুং চন্না আসামদা তারিবা মনিপুরীসিংনা লোল অমসুং ময়েক মপুঙ ফানা শিজিন্ননবা মমাং চহী কয়াদগী আসামদা খুন্দারিবা মনিপুরীসিংনা আসাম লৈঙাকতা তক্নদুনা লাকখিবগী মহৈ ওইনা হন্দক চহীগী ফেব্রুৱারী থাদা আসাম লৈঙাক্কী এসেম্বলিদা মনিপুরী লোন অমদি ময়েক অসি মনিপুরীসিংদা তম্বা য়ারগনি হায়বগী লৈঙাকনা অয়াবা পীরকখিববু মীলাল কংলৈপাক্কী সেক্রেটরী পাব্লিসিতি সোইবম অরুন মীতৈগী চেরোল অমদা আসাম লৈঙাক্কী মফমদা থাগৎপা ফোঙদোরকলি। চেরোল অসিনা হায় মমাংথা জুনগী ৫ দা আসাম লৈঙাক্কী এসসিইআরটি দিপার্তমেন্তকী দাইরেক্তর দাঃ নীরদা দেবী আসাম কাহিলাপারা গুৱাহাতিনা আসামগী মনিপুরী স্কুলসিংদা মথং চহীদগী হৌদূনা ক্লাস ৱান অমসুং টু দা তমগদবা বেঙ্গলি ময়েক্কী লাইরিক তরুক মীতৈ ময়েক্তা ওন্থোক্নবা ওর্দর অমা থোকখিবগা লোয়ননা মনিপুরী সাহিত্য পরিষদকী প্রসিদেন্ট সেক্রেটরী অমদি মনিপুরী লেঙ্গুয়েজ প্রোতেক্সন কোর্দিনেতিং কমিতিগী প্রসিদেন্ট অমসুং সেক্রেতরীদা অইবা চেরোল অমা থারক্তুনা লাক্লিবা ওক্টোবর নভেম্বর থা ফাওবগী মনুংদা মীতৈ ময়েক্কী লাইরিক শেম শানবা খঙহল্লকখ্রে হায়রি। আসাম লৈঙাকনা মনিপুরীসিংগী ওইনা লোল অমদি ময়েক চাওখৎ হন্নবা অখন্নবা থৌরাং থৌসিল অমা লৌখৎপিরকপা অসিগী দমক জুলাইগী তাং ১২ দা মীলাল ময়ায় লোয়শঙদা মীলালগী প্রসিদেন্ট খাইদেম ইঙোচা না ময়ায় তাংবল লৌদুনা পাঙথোকখিবা মীফম অমনা আসাম লৈঙাকপু ঙমখৈ লৈতনা থাগৎপা ফোঙদোকখ্রে।