লাইতোনজম মনিধন-ইবেমহন ইজুকেসনেল ট্রাস্ত, লখিপুরনা মকোক থোংনা পাস তৌরকখিবা মহৈরোয়সিংদা শেলগী মনা য়েন্থোকখ্রে

লখিপুরওনলাইন ডিজিতেল ডেস্কঃ হৌখিবা শগোলসেন নুমিত ওক্তোবরগী তাং ১০ দা লাইতোনজম মনিধন-ইবেমহন ইজুকেসনেল ট্রাস্ত, লখিপুরনা থৌরাংদুনা মমাংগী চহী খরদগী পাঙথোকতুনা লাকপগুম হন্দক চহীগী হৌখিবা মেত্রিক পরিক্ষাদা লখিপুর কো-দিস্ত্রিক অসিগী মনুং চনবদা লৈরিবা স্কুলদা তমদুনা মার্ক ৱাংনা পাস তৌখিবা মহৈরোয় অহুমদা সেল ওইনা লুপা লিশিং মঙা মঙা লোয়ননা ত্রোফি অমদি সার্তিফিকেত পীদুনা ইকায় খুম্নখ্রে।

লখিপুর খুনৌগী লৈখিদ্রবা ওজা মনিধনগী সঙ্গায়দা পোথারবা ওজা ইঙুদম বিনোদ না মীফম মপু ওইদুনা চম্না পাঙথোকখিবা থৌরম অমদা পোথারবা এসিএস কাঙবম শান্তিকুমারনা অথোয়বা মীথুংলেন অদুগা পোথারবা মেজোর ফুরিৎসাবম মনিধন অমদি নহামরূপ কাছারগী প্রেসিদেন্ট ওইনাম বিরমনি অনিনা অখন্নবা মীথুং ওইনা থৌরমদা শরুক য়াখি। থৌরম হৌগৎলকপদা ট্রাস্ত অসিগী চেয়ারমেন লাইতোনজম রোমী দেবী না তরাম্না ওকপগী ৱারোল পীখি অমদি ট্রস্তকী সেক্রেটরী এল মনিশঙ্করনা থৌরমগী নুংগী ওইবা ৱারোল পীখিবগা লোয়ননা লৈখিদ্রবা ওজা এল মনিধননা পামজরম্বা ৱাখল্লোন ফোংদোকখি।

 মনা ফংখ্রবা মহৈরোয়শিং অদুদি সিঙ্গেরবন্দ হায়স্কুলদগী মেত্রীকতা 89% ফংদুনা পাস তৌখিবী টিঐইচ লক্ষীপ্রিয়া দেবী,  বরাক ভেলী সেকেন্দরী স্কুলদগী মনিপুরী এমআইএল দা 99% ফংখিবী তায়িবা বিলকিস অমদি ইমানুয়েল ইংলিস হায়স্কুল পোয়লাপুলদগী জেনরেল মেথমেতিক্সতা 90% ফংখিবা ৱাই লমজিংবা নি। মীস লিন্থোইঙম্বী সিংহ দা স্পিসিয়েল এপ্রিসিয়েসনগী মনা পীখি। থৌরম লোয়শিল্লকপদা টিঐইচ মোনিন্দ্র না থাগৎ ৱাহৈ ফোঙদোকখি। থৌরমদা লৈখিদ্রব ওজা মনিধনগী লোয়নবী লাইতোনজম ওংবী ইবেমহন দেবীসু শরুক য়াখি।