লখিপুরওনলাইন দিজিতেল দেস্কঃ ঙরাং নুংথিলদা গৌহাতিদা পাঙথোকখিবা চীংলেম্লবা থৌরম অমদা আসাম লৈঙাক্কী মাইগৈদগী তোকিও ওলিম্পিকতা বোক্সিং মসাননদা সেঞ্জেংগী তকমান লৌরকখ্রবী লবলিনা বোরগোহাইবু তরাম্না ওকখ্রে। থৌরমদা আসামগী চীফমিনিস্তর দঃ হিমন্ত বিশ্ব শর্মানা লাবলিনাদা মখুত্তা লুপা কোতি অমা খুৎশিন্নখ্রে। মসিগী মথক্তা হৌজিক্তগী হৌরগা মথংগী পেরিস ওলিম্পিক ফাওবদা থাগী ওইনা লুপা লাখ অমমম তৌদুনা স্কোলারসিপ পীগদৌরি। অসোমদা লবলিনা বোহগোহায়দা রাজ্য পুলিসকী দিএসপি রেঙ্ককী ফম পীখ্রে। আসাম লৈঙাকনা লবলিনাগী পোক্নফম লমদম গোলাঘাত জিলাগী সোরুপাথরদা স্পোর্তস কমপ্লেক্স অমা লুপা কোতি ২৫ চংনা শাগদৌরি। অসিতা নত্তনা গৌহাতিগী মনুং চনবদা লৈবা লম্বী অমা লবলিনা গী মীংদা থোল্লগনি হায়খ্রে। লাবলিনাবু তাকপী তম্বীরকখিবা কোচ মঙাদা আসাম লৈঙাক্কী মাইগৈদগী লুপা লাখ ১০ তৌদুনসু পীরগনি হায়না চীফ মিনিস্তরনা ফোঙদোকখি।