লখিপুরওনলাইন নিউজ দেস্কঃ- ওনলাইনগী খুৎথাংদা ইথোক ইশিন, ফোতো নত্রগা ভিদিও থাদোক থাজিন তৌরিবা অসিগী মথক্তা য়েংশিন্নবগী কেন্দ্রনা লৌখৎলকপা অনৌবা থৌরাংশিংগী মায়োক্তা ৱাটস্এপনা আইনগী ওইবা মতেং লৌগদৌরি। তৌইগুম্বশুং মীওই অমগী লৈরিবা অধিকারশিংগী মথক্তা য়েংশিনবগীসু তঙাইফদবা লৈ হায়না কেন্দ্র সরকারগী মাইগৈদগী ফোঙদোক্লি। মেগী তাং ২৬ য়ুমশাকৈশা নুমিৎতগী ভারত্তা আই টি রুলস্ ২০২১ চৎনবা হৌরে। মসিনা ইন্তরনেতকী খুৎথাংদা ইথোক ইশিন, ফোতো অমসুং ভিদিও নচিংবা থাদোক থাজিননচিংবা তৌরিবশিং ৱাট্সএপ, ফেসবুক, টুইটর, ইন্সতাগ্রাম অমসুং ইউতিউব নচিংবা সোসিয়েল মেদিয়াগী প্লেটফোর্মশিংনা কেন্দ্রদা ফোঙনা খঙহন্দবা ইয়ামক য়াদ্রে। লৈঙাক্কী মাইগৈদগী সোসিয়েল মেদিয়াগী প্লেতফোর্মশিংদা হীরম অসিগী মতাংদা তাংদাংবা ৱাফম ফোঙদোক্নবা থা অহুমগী মতম পীখিবা অদু হৌখিবা লৈবাকপোকপা নুমিত্তা অরোইবা নুমিৎনি। অতৈ অতৈশিংদি সরকারনা লৌখৎলকলিবা অনৌবা চৎন পথাপশিং ইন্দুনা চৎনবা শেম শাবা হৌখ্রবসু ৱাট্সএপ তি অনৌবা আইন অসিগী মায়োক্তা দিল্লি হায়কোর্ত য়ৌখ্রে। কেন্দ্রগী আইতি মন্ত্রী রবিশঙ্কর প্রসাদনা হায় নাগরিকশিংগী লনাই ওইবা অরোন অথুপশিং প্রাইভেসিসিংবু ঙাকশেন্দুনা থম্বীবা হায়বসিদা সরকারগীসু চাউরবা থৌদাং লৈ। অদুম ওইনমক আইন অমসুং জাতি অমগী ঙাকশেনবগী ৱাফম লাকপদা হায়রিবা খুদিংমক অসিবুসু লৈঙাকনা য়েংশিনবগীসু মথৌ তায় হায়খি।
লৈঙাক অসিনা মিনিস্ত্রি অফ ইলেক্ত্রোনিকস্ এন্দ ইনফোরমেসন তেক্লোলোজিগী মখাদা ২০২১ গী ফেব্রুৱারীদা শেমখিবা অনৌবা রুলস্কী মতুং ইন্না ইউজার লাখ ৫০ গী মথক্তা লৈবা সোলিয়েল মেদিয়া প্লেতফোর্মশিংদা অনৌবা রুলস অসি চৎননবা খঙহনখিবা লৈখ্রে।
লৈবাক অসিবু ফত্রবা মীওইশিংগী মখুত্তগী কন্ননবগী দমক মরাল লৈবা মীওইশিংবু মশক খঙদোক্নবা, সোসিয়েল মেদিয়াবু অরানবা মওংদা শিজিন্নবা মীওইশিং, ওনলাইনগী খুৎথাংদা নুপী নহাদা কাহেনবা থবক চৎথবা অমসুং মখোয়বু চৈরাক পীনবা হোৎনবদা সোসিয়েল মেদিয়াগী প্লেতফোর্মশিংনসু মখোয়গী মেসেজ শিং অদু কদায়দগী লাকপনো হায়বদু সরকারদা খঙহনফম থোকই হায়বসিনি। হৌজিক্কী ওইনদি ৱাটসএপতা থানরিবা ইপাউশিং অসি এন্দ্ তু এন্দ এনক্রিপসন তৌবনা মেসেজ থারিবা অমসুং মেসেজ ফংলিবা মীওই অদু নত্তনা হায়রিবা মেসেজ অদু অতৈ থার্দ পার্তি কনা অমত্তনা খংবগী উপায় লৈতে। প্রাইভেসি অমসুং সিকিউরিতি অনিগী মরক্তা করম্বনা খরা লূম্বগে হায়বদু খরনিসিদা খঙলগনি। অদুম ওইনমক লৈঙাক্কী মাইগৈদগী য়াৎথোকতুনা থমলিবা ৱাফমশিং অদু ইন্দুনা চৎত্রবদি হায়রিবা সোসিয়েল মেদিয়াগী প্লেটফোর্মশিং অদু থীংজিল্লবা য়ানা লৈরি।