লখিপুরওনলাইন দিজিতেল দেস্কঃ লমদম অসিগী শক্নাইরবা সাহিত্যগী সেবক অমসুং সোসিয়েল ৱার্কর শ্রী হাওবম গৌরহরি সিং দিসেম্বরগী তাং ২৯ লৈবাকপোকপা নুমিৎকী নুমিদাং পুং ১১ রোম তারকপদা লৈখিদ্রে। লৈখিদবা মতমদা মশাগী চহী ৯২ শুখ্রে।
শ্রী হাওবম গৌরহরি সিং খৃঃকুমজা ১৯২৮ আগষ্ট ২৫ দা কাছাড় জিলাগী শ্রীবারদা পোকখি। অপোকপগী মিংনা হাওবম আতয়াইমা সিং কৌই অমসুং অপোকপীগী মিংনা হাওবম ওংবী ইমাহল দেবী কৌই। গৌহাটী ইউনিভার্সিতিগী গ্রেজুয়েতনি। মহাক মণিপুরি লোন অমসুং সাহিত্য চাউখৎনবগী থবক থৌরম কয়াদা শরুক য়াদুনা লাক্লি। মণিপুরী সাহিত্য পরিষদ, আসামগী ভাইস-প্রেসিডেন্ট অমসুং লক্ষীপুর দিস্ত্রিক কমিটিগী সভাপতিসু ওইরম্মী। নহামরূপ কাছারগী ফাউন্দর প্রেসিদেন্টনি। আসাম সরকারগী কোঃ অপারেটিভ সোসাইটিগী সব-রেজিষ্ট্রার ওইনা খৃঃকুমজা ১৯৮৭দা থবক্তগী পোথাখি। থবক্তগী পোথারবা মতুংদা লূপ কয়াদা শরুক য়াবগা লোননা শৈরেং ৱারেং কয়া ফোঙদুনা সাহিত্যগী সেবা তৌরকই। মহাক্কী সাহিত্যগী থবক-থৌরম কয়াদা পেনবিরদুনা মণিপুরী সাহিত্য পরিষদ, ইম্ফালনা খৃকুমজা ২০০৯ দা সাহিত্য সেবক হায়বা উপাধি পিখি।
অইবগী ফোঙখ্রবা লাইরিকশিংদি-
১। নোংথাং, ১৯৯৬ (শৈরেং)
২। মিলন কবিতা, ১৯৯৭ (লোন অহুমগী শৈরেং)
৩। মীরমলেনদা লাইরমলেন খোঙচৎ, ২০০৭
৪। সাহিত্য চুমথাঙ, ২০১২
৫। রম্য রচনা চরোঙ, ২০১২