লখিপুরওনলাইন দিজিতেল দেস্কঃ কাছার বাঁশকান্দি গী মনুং চনবদা রাণীপুরগী শক্নাইরবা সিনিয়র সিতিজেন অমসুং মনিপুরী সাহিত্য়গী থৌগল তৌরম্বা ঙারিয়াম্বম গৌরচন্দ্রনা লৈখিদবদা লখিপুর অহল মরূপনা অৱাবা ফোঙদোরকখ্রে। লূপ অসিগী প্রেসিদেন্ট থোইদিংজম ধীরেন্দ্রনা মীফম মপু ওইদুনা লখিপুর খোরিরোল শংলেন্দা পাঙথোকখিবা অৱাবা ফোঙদোকপগী মীফমদা থৌবুরেন ইঙুদম বিনোদনা মহাক্না তৌরম্বা থবক থৌরমশিংগী মতাংদা ৱা ঙাংখি। পনবা য়াই, ঙারিয়াম্বম গৌরচন্দ্র হৌখিবা দিসেম্বরগী তাং ২৩ য়ুমশাকৈশা নুমিত্তা মশাগী ময়ুম রাণীপুরদা লৈখিদবনি। লৈখিদবা মতমদা মশাগী চহী ৮৭ শুখ্রে। মহাক লখিপুর অহল মরুপকী ফাউন্দার প্রেসিদেন্টনি। খৃঃকুমজা ১৯৬৭ তগীনা ১৯৭২ ফাওবা মনিপুরী সাহিত্য় পরিষদ আসামগী জেনরেল সেক্রেটরী ওইরম্মী, মনিপুরী সাহিত্য পরিষদ ইম্ফালগী অহানবা মপান মনিপুরগী একজিকিউতিব মেম্বরনি। নেহেরু কোলেজ পোইলাপুলদা চহী ৪ রোম মনিপুরী সাবজেক্কী লেকচরর ওইরম্মী। ১৯৬৮ দা রাজাবাজার দেভলমেন্ট ব্লোককী আঞ্চলিক পঞ্চায়েতকী প্রেসিদেন্ট ওইরম্মী। কাছার নেতিভ পিপল কনফারেন্স সিএনপিসি গী ফাউন্দার প্রেসিদেন্টনি। আসাম মনিপুরী সাহিত্য পরিষদনা ফোঙবা “অনৌবা ঈচেল” কৌবা মেগাজিনগী ইদিতর ওইরম্মী। আসামদা মনিপুরী লোননা মহৈ তম্নবা হোৎনবদা অচৌবা থৌদাং য়ারম্মী। ১৯৬৩ গী মতমদা মনিপুরী সংস্কৃতি সংঘ গী জেনরেল সেক্রেটরীগী থৌদাং পুদুনা মনিপুরী কলচর য়োকখৎনবা হোৎনবিরম্মী। ২০০২ দগী ২০১২ ফাওবা সিনিয়র সিতিজেন ফোরাম লখিপুরগী প্রেসিদেন্টকী থৌদাং পুরম্মী। কাছার জিলা কংগ্রেস আইগী অহানবা জেনরেল সেক্রেটরী ওইখিবগা লোয়ননা ১৯৭৮ অমসুং ১৯৮৩ দা লখিপুর বিধানসভাদা অনিরক এমএলএগী মীরেপ ওইনা মীখলদা শরুক য়াখি। ঙারিয়াম্বম গৌরচন্দ্র ১৯৩৩ গী ফেব্রুৱারীগী তাং ২৪ দা কাছারগী রাণিপুরদা পোকখি। ( পাউ অসি ইউতিউবতা য়েংবিউ )