 |
| থৌদাম কবিতা দেবী |
সাউথ এশিয়ান গেমস (সাফ)কী ফেন্সিংগী তীম ইপি ইভেন্তা ভারতনা মায় পাকখিবগা লোয়ননা থৌদাম কবিতা দেবী সনাগী তকমান অনি ফংলে। লখিপুরগী তোলেনগ্রামদগী হৌখিবী থৌদাম কবিতা দেবীগী মিং ভারতকী শান্নবগী পূৱারীদা সনাগী কালিনা ইদুনা লৈহৌরগনি। নেপালগী কাঠমান্দুদা চৎথরিবা সাফ গেমসকী দিসেম্বরগী ৯ গী অয়ুকতা শান্নখিবা ফেন্সিংগী তীম ইপি ফাইনেলদা কবিতানা লুচিংবা ভারতকী তীমনা য়ুম্বু নেপালবু মায়থিহনখি। ইভেন্ত অসিদা পুন্না মালেমগী লৈবাক মঙানা শরুক য়াখি। সেমিফাইনেল রাউন্দা ভারতনা শ্রীলঙ্কাবু পাঞ্জল ৪৫-২০ দা মায়থিবা পীখি। ফাইনেলদা য়ুম্বু নেপালবু পাঞ্জল ৪৫-৩১ দা মায়থিহনখি। ভারতকী তীমদা শরুক য়ারিবশিংদি থৌদাম কবিতা দেবী, এনা অরোরা, অনুস্কা ধাহিৱাল অমসুং সিতল দালালনি। মালেমগী ওইবা রেঙ্কিংদসু কবিতানা খ্বাইদগী হেল্লি। কবিতাগী রেঙ্ক ১০৩, অনুস্কাগী ২০২, এনাগী ৩৭৬ অদুগা সিতলগী ৬১৭ নি। ফেন্সিং মশান্নসিদা ভারতনা সাফ গেমসতগী সনাগী তকমান ১১ লৌরকখিবগী মনুংদা কবিতাগী সনাগী তকমান ২ য়াওরি। মালেমগী লৈবাক ৭ না শরুক য়াদুনা দিসেম্বরগী তাং ১ দগী চৎথরকখিবা সাফ গেমস দিসেম্বরগী তাং ১০ দা লোয়শিন থৌরম পাঙথোক্কনি। ১৩শূবা সাফ গেমসকী অরোইবা নুমিৎ ফাওবদা ভারতনা সনাগী ১৬৩, লুপাগী ৯১ অমসুং সেঞ্জেংগী তকমান ৪৩গা লোয়ননা পুন্না তকমান ২৯৭ লৌদুনা মেদেল তেলিদা খ্বাইগী মকোকতা লৈরে। শ্রীলঙ্কানা অপুনবা মেদেল ২৪০ গা লোয়য়না ৩শুবদা লৈখি অদুগা য়ুম্বু নেপালনা মেদেল ১৯৭গা লোয়ননা ৩ শুবদা লৈরি।
থৌদাম কবিতা দেবী কাছার জিলাগী লখিপুর সাবদিবিজনগী মনুং চনবদা লৈবা থৌদাম গোবিন্দাস সিংহ অমসুং থৌদাম ওংবী নন্দরানী দেবীগী মচানুপীনি। মচীন মনাও অহুমগী মনুংদা মহাক্না য়াইমনি। ক্লাস সিক্স তম্লিঙৈদগী গুৱাহাতিগী সাইদা মিং চন্দুনা শান্নবগী লমদা হেন্না পুক্নিং লুপ্পা হৌখি। সাউথ কোরিয়ানা য়ুম্বু ওইদুনা ইঞ্চিওনদা পাঙথোকখিবা ১৭শুবা এসিয়ান গেমসতা মহাকসু ভারতকী ফেন্সিং তীমদা শরুক য়াবগী খুদোং চাবা ফংখিবনি অদুবু সরকারগী মাইগৈদগী অয়াবা ফংদবদগী য়াওবা ফংখিদে। ইজরাইল ফেন্সিং এসোসিয়েসননা শিল্লাংদুনা ইজরাইলগী মালোট তার্সিলাদা পাঙথোকখিবা পীস কাপ সেতেলাইট ফেন্সিং তোর্নামেন্টতা থৌদাম কবিতা লুপাগী তকমান লৌরকখি।
২০০৯-১০দা মহাক ৱার্লদ রেঙ্কিংদা ৫১৭, ২০১৬-১৭ দা ১৬৮, ২০১৭-১৮ দা ৫১৫, ২০১৮-১৯ দা ১৩৫ অদুগা হন্দক সাফ গেমসতা সনাগী তকমান ফংলকখিবগা লোইননা মহাক্কী ৱার্লদ রেঙ্কিং ১০৩ শুবদা হায়গৎলকখি। হৌখিবা চহীদা আসামগী মুখ্যমন্ত্রী সর্বানন্দ সোনোৱালনা শান্ন-খোৎনবগী লোয়শঙদগী লুপা লিশিং ৫০ মনা ওইনা পীরকখি। লখিপুরগী এম.এল.এ. রাজদীপ গোৱালা না লুপা লাখ ১ লিশিং ১০ মতেঙ পীরকখি। কবিতানা মায়পাক্লকপা অসিদা লখিপুরগী এম.এল.এ. রাজদীপ গোৱালা, ৱার্দ কমিসনার লৈশুংবম রবীন্দ্র সিংহ, ভাইস চেয়ারমেন মৃনাল কান্তি দাস নচিংবা মীওই কয়ানা হরাও তয়াম্বা ফোঙদোক্নরকলি।
————————————————————
Get latest News Updates Please Download our Android app CLICK HERE
To Subscribe our YouTube Channel LICK HERE
————————————————————