রেল্লি অদুদা মণিপুরদগী এআইএসজিইসিগী লুচিংবশিং মাইস্নাম জয়কুমার, লাইময়ুম ইশ্বরজিৎ শর্ম্ম, টি.ঐচ. অনীতা দেবী অমসুং কে.ঐচ. রোনেন্দ্রজিৎ নচিংবা মীওই কয়াগা লোয়ননা এআইটিইউসি মণিপুরগী লুচিংবশিং অমদি আশা/অঙ্গনৱাদিগী মীহুৎ ১৮ না শরুক য়াখি।
রেল্লি লোয়রকপদা পাংথোকখিবা পব্লিক মীটিংদা এআইএসজিইসিগী প্রসিদেন্ট ইউপিদগী শ্রী কার্টার সিংহ, কনফেডরেসনগী চিয়ারমেন হরিয়ানাদগী মীষ্টর সেহাগার, এআইএসজিইসিগী জেনরেল সেক্রেটরি তামিলনাদুদগী মিষ্টর জোস প্রকাস, অমসুং ৱেষ্ট বেঙ্গল, জম্মু এন্দ কাশ্মির, পঞ্জাব, বিহারগী প্রসিদেন্টশিং অমদি মণিপুরগী এম. জয়কুমার (এআইএসজিইসিগী সেনিয়ার ভাইস প্রসিদেন্ট)না শরুক য়াখি।
এআইটিইউসিগী নেসনেল জেনরেল সেক্রেটরি অমরজিৎ কোরনা পার্লিয়ামেন্ট মার্চকী খোংচৎ হৌদোকপদা হায়, "ঙসিগী লৈঙাক অসি এম্প্লোয়ীশিংগী মায়োক্তা খক্তা লৈবা নত্তে, ভারতকী মীয়ামগী মায়োক্তা লৈবা বিজেপিগী লৈঙাক ওইরে". মহাক্না মখা তারদুনা, "মিষ্টর মোডিনা কেপিটেলিজম কাংবুদা কত্থোক্তুনা ভারতকী মীয়াম কোটী ১৪০ গী হক পুম্নমক মাংহল্লে. লৌমীশিংবু ওৎ-নৈরি. লৌমী চা কয়া স্ট্রাইক তৌবদা শিখ্রে, অদুবু মোডিনা নোংমত্তসু পনবা তৌদে।" "এআইটিইউসিনা মে থাগী তাং ২০ দগী চহি অসিগী ওইনা স্ট্রাইক অহুম তৌগনি। আশা, অঙ্গনৱাদি নচিংবা পুম্ববু রিগুলরাইজ তৌনবা স্ট্রাইক অসিদা তকশিনগনি। এসোসিএসন, কনফেডরেসন পুম্বা এআইটিইউসিগা চুংশিন্নদুনা স্ট্রাইক চঙমিন্নরসি।"
মহাক্না মণিপুরগী মতাংদা হায়দুনা, "মোদী লৈঙাক্না মণিপুরগী ৱাথোক ঙসি ফাওবা লোয়শিনদ্রি। মী লিশিং ৬০ না রিলিফ কেম্পতা চহি অনি হেন্না খাংলি। মদুগীদমক ইকনোমিক পেকেজ অমা পীবা তৌদ্রি। অদুবু কেপিটেলিষ্ট অম্বানি অমসুং অদানিগীদি বেঙ্কতগী লোন্না পুখিবা শেনফমশিংদি কোকথোকখ্রে।"
এআইএসজিইসিগী হান্নগী চিয়ারমেন মিষ্টর সহেগলনা হায়খি, "ভারতনা ট্রেড ইউনিয়নশিং, শুরি-নোমলিবা শিন্মীশিং লোয়ননা এম্প্লোয়ীশিংনা বৃটিষ্টতগী নীং তমহন্নবা লান তৌদুনা লাকপনি। অদুক্কী মতিক কত্থোকপগা লোয়ননা শেমগৎলকপা ভারতপু মচেৎ-মচেৎ কায়নবা হোৎনরিবা বিজেপি-আরএসএসকী অশোয়বা থৌশিল অসি থেংননবা হোৎনগদবনি। ঙসিগী এম্প্লোয়ীশিং, শিন্মীশিং অমদি মীচম মীয়াম্না ভারত কন্নবা অমদি তুংগী ইচা-ইশুশিংগী অফবা লৈবাক অমা ওইনা থম্লসি".
এআইএসজিইসিগী নেসনেল প্রসিদেন্ট শ্রী কার্টার সিংহনা হায়খি, "ওল্দ পেন্সন স্কিম (OPS) হায়বসি মতম অমগী এম্প্লোয়ী ওইরম্বা কয়ানা হোৎনবীরকপদগী লাকখিবনি. অদুবু ঙসিগী লৈঙাক্না OPS পু মুত্থৎলগা নিউ পেন্সন স্কিম (NPS) অমসুং ইউনিফাইড পেন্সন স্কিম (UPS) হায়জিন্দুনা এম্প্লোয়ীশিংনা পেন্সন চৎলবা মতুংদা থুনা শিখিনবা হোৎনরি"।
আইএসজিইসিগী জেনরেল সেক্রেটরি জোস প্রকাসনা হায়খি, "মালেমগী ডেমোক্রেসি অমদি কন্সটিট্যুসনগী খ্বাইদগী চাওখ্রবা ভারত ঙসিদি লৈঙাক্না সার্ভিস সেক্টরবু মুত্থৎনবা হোৎনরি। আউটসোর্সেস পোলিসি অমা চৎনদুনা খুদক্তা রিগুলার ওইদবা এম্প্লোয়ী কয়া লৌবগী চৎনবী অসিনা সেক্টর অসি মাংহন তাকহল্পক্লি।" মহাক্না মণিপুরগী অৱাবা থেংনরিবা মীয়াম অমদি এম্প্লোয়ীজ মরুপশিংগী দমক শৌগৎখি।
মণিপুরগী এম. জয়কুমারনসু থৌরমদুদা এম্প্লোয়ীজশিংনা লুচিংদুনা মীয়ামগী য়াইফনবা পুরক্নবা হোৎনগদবনি হায়না পনখি। ৱেষ্ট বেঙ্গল, কেরলা, পঞ্জাব, তামিল নাদু, জম্মু কাশ্মির নচিংবগী প্রসিদেন্টশিংনসু ৱা ঙাংদুনা এম্প্লোয়ীশিং অমদি ভারতকী শিন্মী পুম্নমকপু লৈঙাক্কী অশোয়বগী মায়োক্তা থেংনমিন্নরসি হায়না অপীল তৌখি।
অরোয়বদা, অপুনবা মীয়ামগী "ইন কিলাপ জিন্দাবাদ!", "অল ইন্দিয়া ষ্টেট গভর্নমেন্ট এম্প্লোয়ীজ জিন্দাবাদ!", "ইন্দিয়ান ৱার্কিং ক্লাস জিন্দাবাদ!" স্লোগানশিং লাউবগা লোয়ননা পার্লিয়ামেন্ট খোংচৎ অদু লোয়শিনখি। রেল্লি অসিগী মনুং চন্না এআইএসজিইসিগী থৌ পুবা অহুম খনগৎতুনা ইউনিয়ন ফাইনান্স মিনিষ্টরদা মেমোরেন্দম অমা পীশিনখি হায়না অল ইন্দিয়া ষ্টেট গভর্নমেন্ট এম্প্লোয়ীজ কনফেডরেসন (AISGEC)গী নেসনেল একজেক্যুটিভ, টিঐইচ. অনিতা দেবীগী চেরোল অমদা ফোঙদোরকলি।
