প্রধান মন্ত্রীগী ওফিস মমাঙদা খোংজং চংশিনখিবগা লোয়ননা মনিপুরদা থোক্লিবা ইরাং অসি অথুবদা লোইশিন্নবা মেমোরেন্দম অনি পিশিনখ্রে
লখিপুরওনলাইন ডিজিতেল ডেস্কঃ ওল ইন্দিয়া স্টেট গভর্ণমেন্ট এমপ্লয়ীজ কনফেডারেশন (AISGEC) মনিপুর ইউনিট অমসুং অল ইন্দিয়া ট্রেড ইউনিয়ন কংগ্রেস (AITUC) মনিপুর স্টেটকী মীহুৎশিংনা প্রধান মন্ত্রীগী ওফিস মমাঙদা অচৌবা খোংজং অমা ঙসি (এপ্রিল ১১, ২০২৫) চত্থখ্রে । খোংজং অদুনা মনিপুরদা থোক্লিবা ইরাং অসি অথুবদা লোইশিন্নবা অমসুং তংদু লৈতাবা পুথোক্নবা তকশিনখিবগা লোয়ননা খোংজংগী মতুংদা, লুচিংবশিংনা প্রধান মন্ত্রী শ্রী নরেন্দ্র মোদীদা মেমোরেন্দম অনি পিশিনখি ।
মেমোরেন্দমশিং অদুদা য়াওরিবা মরুইওবা ৱাফমশিং অদুদি:
- মনিপুরদা থোক্লিবা ইরাং অসি অথুবদা লোইশিন্নবা অমসুং শান্তি পুরক্নবা ।
- মনিপুরদা দেলিমিটেশন তৌবা য়ারোই ।
- মনিপুরগী নেস্নেল হাইৱেশিংদা মীয়াম্না ফ্রী ওইনা চৎথোক-চৎশিন তৌবা য়ানবা ।
- এমপ্লয়ীশিং, ওজাশিং, অমসুং দোক্তরশিং মশা মশাগী পোস্টিংদা থবক তৌবা ফংহনবা ।
- প্রধান মন্ত্রীনা মনিপুরদা লাকপীদুনা ফিজেকেল অমদি মোরেল সাপোর্ত পীবা ।
- Old Pension Scheme অমুক হন্না চৎনহনবা ।
- মনিপুর সরকারগী এমপ্লয়ীশিংগী রিটায়রমেন্টকী চহী ৬২দা ওইহনবা ।
- ভারত সরকারনা আউটসোর্সিং তৌদুনা সর্ভিস সেক্তর মুথৎপগী থবক লেপ্নবা ।
- Highway Protection Force অমা অথুবদা লিংখৎনবা অসিন চিংবনি।
খোংজং অদুবু পুলিসনা থিংজিনখি অমসুং মীহুৎশিংনা খোংজং অদু মখা তানা চত্থবা ঙমখীদে হায়রি ।
AISGEC গী প্রেসিডেন্ট এম. জয়কুমার লুৱাং অমসুং AITUC গী জেনরেল সেক্রেটরী এল. সোতিনকুমারনা সহী তৌবা মেমোরেন্দমসিং অদুগী কোপি মনিপুর লোক সভাগী MP প্রোফেসর বিমোল অকোইজম অমসুং CPI গী জেনরেল সেক্রেটরী ডি. রাজাদসু পিশিনখি হায়না AISGEC গী স্টেট সেক্রেটরী, দাঃ E গিরানী গী পীখিবা প্রেস চেরোল অমদা হায়রি।
