চন্দ্রপুর মহারাজা গম্ভীর সিংহ মেমোরিএল কমিটিনা স্পীকার থোকচোম সত্যব্রতবু তরাম্না ওকখ্রে

মহারাজ গম্ভীর সিংহ মেমোরিএল কমিটি চন্দ্রপুর কাছারনা স্পীকার থোকচোম সত্যব্রতবু তরাম্না ওকখ্রে

লখিপুরওনলাইন ডিজিটেল ডেস্ক, ১৫ এপ্রিল ২০২৫ঃ মহারাজ গম্ভীর সিংহ মেমোরিএল কমিটি চন্দ্রপুর কাছারনা মনিপুর লেজিসলেটিভ এসেম্বলিগী স্পীকার থোকচোম সত্যব্রত সিংহবু তরাম্না ওকখ্রে।

ঙসি নুংথিল পুং ৩.৩০ দা স্পীকারনা চন্দ্রপুরদা লৈবা মনিপুর লেভি গ্রাউণ্ডদা চৎতুনা ইনিংথৌ গম্ভীর সিংহ অমদি মৈদিঙঙু নর সিংহগী মীতমদা লৈ কৎতুনা থৌনীজরবা মতুং মহারাজ গম্ভীর সিংহ মেমোরিএল কমিটিগী প্রেসিডেন্ট কৈশাম বিদ্যাপতিনা মীফম মপু ওইদুনা থৌরমদু মাঙ থানা চিংখি, অদুগা থোকচোম সত্যব্রতনা মীথুংলেন অমদি ইকায় খুম্নজবা মীথুং ওইনা মনিমোহন সিংহ (প্রেসিডেন্ট অৱাপলি খুভম নিংশিং লুপ কামরাঙ্গা), বিশ্বজিৎ সিংহ (প্রেসিডেন্ট লেঙওন্দবী পাৎ প্রোটেকশন এণ্ড প্রিজার্ভেশন কমিটি কাছার) অমদি সাবিত্রী দেবী (প্রেসিডেন্ট চন্দ্রপুর মৈরা পাইবী লুপ)না দাইসতা ফমখি।

থৌরমগী ৱাহৌদোক পীরদুনা সেরাম হেরজিৎনা হায়খিবদা পুৱারীগা তৎন থম্বা য়াদ্রবা মফম মনিপুর লেভি লম্পাক অসিদা ইনিংথৌ গম্ভীর সিংহ অমদি নর সিংহগী মীতম খিংবা ঙম্বা অসি ইরমদম মনিপুর অমদি কাছার অসমদা লৈরিবা ঈগী মরি ওইরিবা মীয়ামগী মতেংদগী মাইপাকপা ঙমজবনি, ঐখোয়গী তুংগী মীরোলনা মফম অসি নিংশিংদুনা লৈহৌনবা লোইননা ঐখোয়গী ফুরুপ অসি মতিক ময়াই লৈবা নিং-খা তম্না লৈজবা ফুরুপ অমনি হায়না তাকপা ঙম্নবগী হোৎনজবনি হায়খি।

থৌরমগী মীথুংলেন থোকচোম সত্যব্রতনা হায়খিবদা ঐখোয়গী পুৱারীগা তৎন থম্বা য়াদ্রবা মফম অসি ঙাক্তুনা থম্বা হায়বসি ঐখোয় পুম্নমক্কী থৌদাংনি অদুনা ঐখোয়না অঙম্বা মতেং পাংদুনা হেন্না মতিক মগুন লৈনবা হোৎনমিন্নসি হায়খি।

থৌরমগী মীফম মপু কৈশাম বিদ্যাপতিনা ঙসি ইরমদম মনিপুরদগী লেংবীরক্লিবা স্পীকারবু ঙমখৈ লৈতনা থাগৎচৈ, ঐখোয় চহি কয়া চুপনা মাংজরকপা মাংলান অসি মাংফাওনবদা ইরমদম মনিপুরগী ইউনাইটেড পিপল ফ্রন্ট (UPF) মনিপুর, হিংমিনসি অমদি Myfaগা লোইননা মীয়ামগী অছাওবা মতেংনা মীতম অসি যুংবা ঙমজবনি অদুনা হৌজিক মনিপুর লেভি লম্পাক অসি হেন্না মতিক মগুন লৈনবা হোৎনখিগনি হায়খি।

থৌরমগী লোইশিনবা ওইনা কৈশাম সুরজবাবুনা থাগৎ ৱাহৈ পীরবা মতুং থৌরম অদু লোইশিনখি।