ৱাক্ফ এমেন্ডমেন্ট এক্ট তা শিংনরকপা ৱাফমশিং সুপ্রীম কোর্টনা তাখ্রে; অরোইবা য়াথং পীখিদ্রে, মথং অমুক তানবগী মতম লেপখ্রে

লখিপুরওনলাইন ডিজিটেল ডেস্ক, ১৬ এপ্রিল ২০২৫ঃ

ভারতকী সুপ্রীম কোর্টনা পাস তৌখিবা ৱাক্ফ (এমেন্ডমেন্ট) এক্টকী সংবিধানগী মতুং ইন্না চৎনবা য়াব্রা হায়বগী মতাংদা শিংনদুনা পুশিল্লকপা পিটিশন ১০০ হেনবগী ৱাফমসিং ঙসি তাখ্রে। চীফ জষ্টিস ওফ ইন্দিয়া (CJI) সঞ্জিব খান্নানা লুচিংবা জজ অহুমগী বেঞ্চ (জষ্টিস সঞ্জয় কুমার অমসুং জষ্টিস কে ভি বিশ্বনাথনগা লোয়ননা) অমনা পুং অনি রোম চংনা চত্থখিবা থৌরম অসিদা, মরুওইনা এক্ট অসিগী তোঙান তোঙানবা প্রোভিজনশিংগী মতাংদা চাওনা খন্ন-নৈনবা থোকখি। মসিদা, কোর্টনা অরোইবা মতমগী য়াথং অমা পীগদৌবগী ৱাখল্লোন ফোংদোক্লবসু, কেন্দ্র সরকারনা হেন্না অমুক খন্ননবা মতম দরকার ওই হায়বগা লোয়ননা ৱাফম অসি এপ্রিল ১৭ গী নুংথিল পুং ২ তাবা মতমদা অমুক্কা তানবা মতম লেপখ্রে।

মসিদা, পিটিশানরশিংগী মাইকৈদগী সেনিয়র এডভোকেট কপীল সিবাল, অভিষেক মনু সিংভি, রাজিব ধৱনগুম্বা মীওইশিংনা এক্ট অসিনা ইসলাম ধর্মগী চৎনবী অমসুং ৱাক্ফকী প্রোপরটীশিং শেন্নবদা অচৌবা খুদোংচাদবা পীরক্লি হায়না ময়েক শেংনা ফোংদোকখি। মখোয়না মরুওইনা প্রোভিজন অহুমগী মতাংদা পেন্দবা ফোংদোকখি:

১. ৱাক্ফ-বাই-য়ুসর (Waqf-by-user) গী থাক লৌথোকপা: চহি কয়ামরুমদগী ধর্ম নত্রগা শেবাগী থবক্তা শীজিন্নদুনা লাক্লবা মফমশিংবু চে চাং য়াওদনা ৱাক্ফনি হায়না লৌনরম্লবা থৌওং অসি অনৌবা এক্টনা লৌথোকপা অসিনা চহিচা কয়াগী চৎনবী অমসুং কোর্টকী ৱারোলশিংগী মায়োক্তা লৈ হায়না পিটিশানরশিংনা পনখি। মসিগী মতুং ইন্না, লৈরিবা ৱাক্ফ লাখ ৮ রোমগী মনুংদা লাখ ৪ রোমদি ৱাক্ফ-বাই-য়ুসরনি হায়রি। অরিবা মতমগী প্রোপরটীশিংগীদমক্তা রিস্জট্রেশন চে চাং দাবী তৌবা হায়বসি ওইথোকলোইদবনি হায়না মখোয়না মখা তাখি।

২. ৱাক্ফ লুপশিংদা মুসলিম নত্তবা মীওইশিং য়াওহনবা: সেন্ত্রেল ৱাক্ফ কাউন্সিল অমসুং স্তেত ৱাক্ফ বোর্দশিংগুম্বা ৱাক্ফকী থবক্কী লুপশিংদা মুসলিম নত্তবা মীওইশিং য়াওহনবা অসি ধর্মগী নীংতম্না থবক তৌবগী হক (Article 26)কী মায়োক্তনি হায়না পিটিশানরশিংনা হায়খি। 

৩. কলেক্টরগী পাৱর অমসুং প্রোপরটীগী থাক লেপহনবা: মফম অমগী মরমদা অয়েৎপা লৈরক্লবদি, মদু সরকারগী লমনি নত্রগা নত্তে হায়বদু কলেক্টরনা থিজিনবা লোইদ্রীফাওবদা লমদু ৱাক্ফ নত্তে হায়না লৌগনি হায়রিবা থৌওং অসিনা চহি কয়া চংবা য়াবা থিজিনবা থৌরমশিংগী মনুংদা ৱাক্ফ প্রোপরটীশিংগী হক্কী মতাংদা অৱাবা ওইগনি হায়না ফোংদোকখি।

মসিগী মায়কৈদা, কেন্দ্র সরকারগী মাইগৈদগী সোলিসিটর জেনেরেল তুষার মেহতানা ফোংদোকখি মদুদি ১৯২৩দগী হৌদুনা থোকখিবা ৱাক্ফ এক্টশিংনা ৱাক্ফ প্রোপরটীশিংগী রিস্জট্রেশন তৌবা মথৌ তাই হায়না পনখি। অনৌবা এক্ট অসি হেন্না ফবা মওংদা থবক তৌনবনি হায়না মখা তাখি অমসুং মসিবু এম পিশিংগী মীফম অমনা য়াম্না কুপ্না খন্নখি হায়না পনখি। কালেক্টরনা থিজিনবা মতমদা প্রোপরটীগী 'থাক' (status) অদু ৱাক্ফ নত্তে হায়না লৌগনি অদুবু মদু 'শীজিন্নবা' থিংলোই হায়না মহাক্না মখা তাখি।

ৱাফমশিং অদু তাবা মতমদা, চীফ জষ্টিস সঞ্জিব খান্না না বেঞ্চকী মায়কৈদগী পেন্দবসিং ফোংদোকখি। মরুওইনা, ৱাক্ফ-বাই-য়ুসরবু ডি-নোটিফাই তৌবা থৌওংনা অচৌবা চৈথেং কয়া পীরকপা য়াই হায়না মহাক্না পনখি। “নখোয়না হৌখ্রবা মতমদু হন্দোকপা ঙম্লোই” হায়না মহাক্না কেন্দ্র সরকারদা হায়খি। মখা তানা, হিন্দু ধর্মগী লুপশিংদা মুসলিম য়াওহনবা য়াব্রা নত্রগা য়াদব্রা হায়বদু সরকারদা হংখি। কলেক্টরগী পাৱর অমসুং মসিগা মরী লৈননা প্রোপরটীগী থাক লেপহনবগী মতাংদা চীফ জষ্টিসনা পেন্দবা কয়া ফোংদোকখি।

ৱাফমশিং অসিগী মতুং ইন্না, কোর্টনা মখাগী পয়েন্ট অহুম য়াওবা অরোইবা মতমগী য়াথং অমা পাস তৌনবগী ৱাখল্লোন ফোংদোকখি:

১. কোর্টনা ৱাক্ফনি হায়না লাউথোকখ্রবা প্রোপরটীশিং (ৱাক্ফ-বাই-য়ুসর য়াওনা) কোর্টনা ৱাফম তারিবমখৈ ডি-নোটিফাই তৌরোইদবনি।

২. কালেক্টরনা থিজিনবা থবক মখা চত্থবা য়াই, অদুবু থিজিনবা মনুংদা প্রোপরটীগী ৱাক্ফ থাক লেপহনবা থৌওং অদু চৎনহল্লোই।

৩. এক্স-ওফিসিও মেম্বরশিং নত্তনা ৱাক্ফ বোর্দস্ অমসুং সেন্ত্রেল ৱাক্ফ কাউন্সিলদা লৈবা মেম্বরসিং  মুসলিম ওইগদবনি।

অদুবু, সোলিসিটর জেনেরেলনা কেন্দ্র সরকারগী মায়কৈদগী হেন্না খন্ননবা মতম দরকার ওই হায়বনা মরম ওইদুনা কোর্টনা ঙসি অরোইবা মতমগী য়াথং পীখিদ্রে। ৱাফম অসি এপ্রিল ১৭ নুংথিল পুং ২ তাবা মতমদা অমুক্কা তাবা হায়না লেপখি।