মীখলগী মাংওইননা এন.দি.এ.না জেদ.পি. ৩৭ অমসুং এ.পি. গী সীট ২৮৮ লম্বা য়াওদনা মায়পাকলে
আসামদা পাঙথোক্কদৌরিবা পঞ্চায়ত মীখল অসিদা বি.জে.পি.না লমজিংবা এলাইয়েন্সনা শোয়দনা মায় পাক্কনি হায়না মুখ্য মন্ত্রী হিমন্ত বিস্ব শর্মনা ফোঙদোকখ্রে। হৌখিবা শগোলশেন নুমিত মীরেপ চে লৌথোকপগী অরোইবা নুমিৎতা এলাইয়েন্স অসিনা জেদ.পি. (Zila Parishad) গী সীট ৩৭ অমসুং আঞ্চলিক পঞ্চায়ত (AP) গী সীট ২৮৮ লম্বা য়াওদনা মায়পাকলে হায়খি।
“সগোলশেন নুমিৎ অসি লাক্কদৌরিবা পঞ্চায়ত মীখলগীদমক মীরেপ চে লৌথোকপগী অরোইবা নুমিৎ ওইখি। রিপোর্ত মতুং ইন্না, এন.দি.এ.না হৌজিক ফাওবদা জি.পি. (বিজেপি ৩৫ অমসুং এ.জি.পি. ২) ৩৭ অমসুং এ.পি. সীট ২৮৮ (বিজেপি ২৫৯ অমসুং এ.জি.পি. ২৯) লম্বা য়াওদনা মাই পাকলে। মসিনা আসামগী রাজনিতিগী পুৱারীদা অচৌবা অমসুং মমাঙদা অমুক্তা থোকখিদ্রিবা মাইপাকপা অমনি। মসিনা মীয়াম্না এন.দি.এ. অমসুং ঐখোয়গী ইকায়খুম্নদরিবা প্রাইম মিনিস্টার শ্রী নরেন্দ্র মোদীগী মফমদা থম্লিবা অচৌবা থাজবা অমসুং নুংশিবা উৎলি,” হায়না শর্মনা এক্সতা ফোংদোকখি।
মহাক্না মখা তাখি, “ঐখোয়না থাজৈ মদুদি ফাইনেল রিজল্ট লাওথোক্লবা মতমদা, মশিং অসি অতৈসু হেন্না চাউনা কাখৎলগনি। আসামদা পঞ্চায়ত মীখলশিং মাই পাক্নবা ঐখোয় লেপ্পা লৈতনা থবক তৌগনি। ঐখোয়না লেপ্তনা থবক তৌখিবা অমসুং কন্না হোৎনখিবা অসিগীদমক মীয়াম অমসুং ঐখোয়গী নুংশিরবা কার্যকর্তাশিংবু ঐহাক্না নুংঙাইবা ফোংদোকচরি অমসুং ইকায়খুম্নবা উৎচরি।”
পনবা য়াই, পঞ্চায়ত মীখল অসি মে ২ অমসুং ৭ দা ফেজ অনিদা পাঙথোক্কনি। ভোট মশিং থিবগী থবকনা মে ১১ দা পাঙথোক্কনি।
গাঁও পঞ্চায়ত (GP) মেম্বরশিংগী সীটকী মশিংদি ২১,৯২০ নি। মসিনা লোয়ননা, এ.পি. মেম্বর ২,১৯২ অমসুং জেদ.পি. মেম্বর ৩৯৭ গী পোস্টকীদমক্তা মীখল পাঙথোক্কনি।
মীখলশিং অসি জি.পি. লেভেলদা পার্টী সিম্বোল শীজিন্নবা তৌদনা পাঙথোক্কনি। অদুবু, পার্টী সিম্বোলশিং অসি এ.পি. অমসুং জেদ.পি. লেভেলশিংদা শীজিন্নগনি।
মসিগী মরক্তা অমুক, ইন্দিপেন্দেন্ত কেন্দিডেটশিংগী মরক্তগী এ.পি. সীট ১৫ মাই পাকখ্রে, মসিদা কংগ্রেসনা ৯ মাই পাকখি অমসুং এ.আই.ইউ.দি.এফ.না সিত অমা মাই পাকখি।
রাজ্যগী জিলা ৩৪ গী মনুংদা, পঞ্চায়ত মীখল অসি জিলা ২৭ দা পাঙথোক্কনি অমসুং লৈহৌরিবা জিলা তরেৎ অসিনা স্বশাসিত (autonomous) কাউন্সিলগী মখাদনি। রাজ্য অসিগী অপুনবা মীওই ক্রোর ১.৮০ ভোট হাপ্পগী খুদোং চাবা পীরি ।
