সাহিত্যবু শৌগৎপিরম্বা শক্নাইরবা রাজকুমার জিতেন্দ্রজিৎ অমসুং লাইশ্রম তেজমনি অনিনা লৈখিদবদা অৱাবা ফোংদোকখ্রে।

লখিপুরওনলাইন ডিজিটেল ডেস্ক, ১৯ এপ্রিল ২০২৫ঃচহী তরাগী মথক্তা জিলা লৈবাক চাওখৎলুপকি প্রেসিডেন্ট গী ফম পাইবিরম্বা শিলচর রামনগর টুকোগী লাইশ্রম তেজমনি, হৌখিবা এপ্রিল গী তাং ১৩ নোংমাইজিং নুমিৎ কী অয়ুক পুং তরেৎ তাবা মতমদা লৈখিদ্রে। লৈখিদবা মতমদা মসাগী চহী ৭৬ শুখ্রে। মহাক অসি রামনগর টুকো গী ক্রিমেটোরিয়ম মেনেজমেন্ট সোসাইটি অমসুং শ্রী শ্রী হরিমন্দির খা লৈকাই নিংশিং খুভম গী প্রেসিডেন্টকী ফমসু পুবিরম্বা মীশকনি। আসাম মনিপুরী ডায়স্পোরা গী প্রেসিডেন্ট গী ফমসু মতম শাংনা পাইবীরম্বা লাইশ্রম তেজমনি মণিপুরী সাহিত্য পরিষদ আসামগী রামনগর ব্রাঞ্চ গী প্রেসিডেন্টকী ফম অমসুং শিলচরগী জননেতা ইরাবোৎ স্মৃতি রক্ষা কমিটি গী মরু ওইবা থৌদাং কয়াদসু শরুক যাবিরম্মি। ইন্দিয়ান স্তেতিকেল সার্বিসতা সেনিয়র সুপারিন্তেন্দেন্ট ওইবিরম্বা লৈখিদ্রবা লাইশ্রম তেজমনিগী শ্রাদ্ধ কর্মা, লাক্লিবা এপ্রিলগী তাং ২৫ ইরাই নুমিত্তা থোকলে হায়রিবা নুমিত অসিদা মহাককী মরী মতা অমদি মহাক্কা লুনা চান্না তৌনরম্বা মরুপ মপাঙসিংনা শরুক য়াবিনবা আর কে গোপালসনা প্রেসিদেন্ত জিলা লৈবাক চাউখৎলুপকী মাইগৈদগী নোল্লুক্না নীংশিংলকলি।

অসোমদা, ইরাই নুমিৎতা মণিপুরী সাহিত্য পরিষদ আসাম, কাছাড় জিলা কমিটি অমসুং শিলচর মাসা(শাখা)না পুন্না পাংথোকখিবা মীফম অমদা সাহিত্যবু শৌগৎপিরম্বা লাইশ্রম তেজমনি অমসুং রাজকুমার জিতেন্দ্রজিৎ অনিনা লৈখিদবদা অৱাবা ফোংদোকখ্রে।

শিলচরদা লৈবা পরিষদকী মরূ শঙলেনদা পাংথোকখিবা থৌরমদুদা শরুক য়াখিবা মীওইশিংনা লাইশ্রম তেজমনি অমসুং রাজকুমার জিতেন্দ্রজিৎ অনিনা খুন্নাইগীদমক পাইখৎলম্বা থবক থৌরম কয়াগী মতাংদা মরু ওইবা ৱাফম কয়া থমবিরমখি।

পানবা য়াবদি লাইশ্রম তেজমনি মণিপুরী সাহিত্য পরিষদ আসাম, মণিপুর লিটরেরী সোসাইটি আসাম অমসুং জিলা লৈবাক চাওখৎলুপ শিলচর নচিংবা খুন্নাইগী লুপ কয়াগা য়াম্না কুইনা চৎমিন্নরকখি।

রাজকুমার জিতেন্দ্রজিৎ অমসুং লাইশ্রম তেজমনি অনিনা লৈখিদবসি মণিপুরী খুন্নাই অসিগী অচৌবা মাংজবা অমনি হায়না মীফমদুদা অমত্তা ওইনা ফোংদোক্নখি।

থৌরমদুদা ৱাই. প্রফুল্ল (প্রেসিডেন্ট, কাছাড় জিলা কমিটি), এন. রাজেন (প্রেসিডেন্ট, শিলচর ব্রাঞ্চ), ডব্লিউ. শুভঙ্কর (ট্রেজারার, MSPA) অমদি অতৈ মীওইশিং শরুক য়াখি । মীফমদুদা নোংথোম্বম ধীরেন, খংজ্রাকপম কৃষ্ণমোহন, কে. করুণা মূর্ত্তি মিশ্রা, এল. হেরামনি, ক্ষেত্রিময়ুম ইন্দ্র কুমার অমসুং রাকেশনা ৱাফম কয়া থমখি।

মিনিট অমা তুমিন্না লেপ্তুনা লৈখিদ্রবা সাহিত্যগী থৌবুরোই অনিগী থৱায়না ইংনা তপ্না মপুগী খুয়াখাদা লৈরুনবগীদমক থৌনিজখি।

১৯৮১ দা এন খেলচন্দ্র, ও ভোগেশ্বর, মুতুৱা বাহাদুর, নীলবীর শাস্ত্রী, আর কে কমলজিৎ, এন নিরঞ্জন গা লোইননা য়াম্বুং আর কে জিতেন্দ্রজিৎ রাধানগর মণ্ডপ তা

ত্রিপুরাগী শক্নাইরবা এজুকেশনিস্ট অমদি মণিপুরি সাহিত্য পরিষদ ত্রিপুরাগী সভাপতি ওইবীরম্বা রাজকুমার জিতেন্দ্রজিত সিংহ এপ্রিল ১৭ আয়ুক্কী পুং ১০.৫৫ তাবদা TMC হোস্পিটালদা লৈখিদবনি। লৈখিদবা মতমদা চহি ৮৭ শুরে‍। মহাক্কী লোইনবী, মচা নুপা অমা মমৌ নুপী অমসুং মশুশিং লৈহৌরি‍। রাজকুমার জিতেন্দ্রজিতনা মতম শাংনা পরিষদকী সভাপতি অমসুং জেনেরেল সেক্রেটরি ওইবীরম্মি‍।

১৯৬৯ দা কোলকাতা য়ুনিভরসিতিদগী ইংলিশতা MA পাস তৌরবা মতুং ত্রিপুরা লৈঙাক্কী এজুকেশন দিপার্তমেন্তকী মখাদা বেসিক ত্রেনিং কোলেজকী ওজা অমদি ত্রিপুরা য়ুনিভরসিতিগী গেস্ট লেকচরারসু ওইবীরম্মি‍। ১৯৯৬ দা থবক্তগী পোত্থারবা মতুং ত্রিপুরা বোর্দ ওফ সেকন্দরি এজুকেশনগী curriculum, Syllabus, Text Book শেম্বগী কম্মিতি কয়াগী মেম্বরসু ওইরম্মি‍।

মহাকপু ত্রিপুরা লৈঙাক্না ২০১০ দা "একুই সে মাতৃ ভাষা সম্মান" পীদুনা ইকাইখুম্নখি‍। মনিপুরগী সাথৌলুপনা "থিয়াম ইবোচৌবি নেস্নেল এৱার্দ" পীদুনা ইকাইখুম্নখি‍। মহাক্না লৈখিদবগী পাউ তাবদা তোঙান তোঙানবা লুপ কয়াগী মীহুৎশিংনা অৱাবা ফোংদোক্নখি‍। মহাক লৈখিদবদা মণিপুরি সাহিত্য পরিষদ ত্রিপুরাগী সভাপতি এল বীরমঙ্গল অমসুং মণিপুরি সাহিত্য পরিষদ আসামগী সভাপতি দ. পীঐইচ. বীরমণি অনিনা থম্মোই শোক্না অৱাবা ফোংদোকখি.