লখিপুরওনলাইন ডিজিতেল দেস্কঃ কুমজা ১৯৫৬ তা ইমারোলনা মহৈ তম্ব ফংবগী আসাম লৈঙাকনা অয়াবা পীখিবা নুমিতপু “ইমা নিংশিংবা নুমিৎ” হায়দুনা থৌগন মরূপ জারিবোন না চহী খুদিংগী লেপ্তনা পাঙথোক্তুনা লাকপগুম মার্চকী তাং ১, ২০২৫ ইং, থাংজ নুমিত্তা থৌগন মরূপ জারিবোন হাইলাকান্দিনা ৬৯শুবা ইমা নিংশিংবা নুমিৎ থৌগন মরূপকী য়াইফ শঙলেন্দা চীংলেমনা পাঙথোকখ্রে।
থৌরম অসিদা থৌগন মরূপকী অঙম্বা নেপ্রম মনিন্দ্রনা মীফম মপু, মীথুংলেন ওইনা পোথারবা অঙম্বা মনিপুরী সাহিত্য পরিষদ আসাম হায়লাকান্দি দিস্ত্রিক কমিতিগী অসেম মনি, অখন্নবা মীথুং ওইনা হিজম বীরেন্দ্র, চোংথাম বাবুতোন, এন ইন্দিরা নচিংবনা ফম্বাকতা লৈতেংখি। পোথারবা প্রিন্সিপাল কামবম চন্দ্রসেখর না অখন্নবা ৱাঙাংলোয় ওইনা শরুক য়াখি। লোয়ননা মৈস্নাম নন্দকুমার, নোংথোম্বম বিশ্বজিৎ, লাইশ্রম মঙালসনা, ডা চেঙ্গিস, থাংজম লানঙমসনা, নাউরেম সনাহল, নাওরেম মাখোন নচিংবা মীওইসিংনা ইমারোল অসিবু চাওখৎনবগী মতাংদা মমল লৈরবা ৱাফম কয়া ফোঙদোকপিখি।
থৌরমসিদা মোইরেংজম দেবসিং সুব্রাম “সাহিত্য রত্ন” মনিপুরী সাহিত্য পরিষদ আসাম, কোনসম বিনোদ বিহারি “সাহিত্য ভুষণ” মনিপুরী সাহিত্য পরিষদ আসাম অমসুং দা ওইনাম উষারানি “সাহিত্য রত্ন” বহুজন সাহিত্য একাদেমী, নিউদিল্লিদা ইকায় খুম্নজবা উৎখি। মোইরেংজম চীংলেন থৌবু, থৌগন মরূপ জারিবোননা তরামনা ওকপগী ৱারোল অদুগা লৌরেম্বম জয়কান্ত ঙমথং থৌবু, থৌগন মরূপ জারিবোননা থাগৎ ৱারোল পীখি। থৌরম অসিদা এলপি অমদি এমই থাক্কী মহৈরোয়শিংগী ওইবা শৈরেং পাথোকপগী থৌরম পাঙথোকখিবগা লোয়ননা মনা মথুমসু য়েন্থোকখি।